11:34 | 26.02.19 | Նորություններ | 2133

ԿԲ-ն մեկնաբանում է՝ ինչու է մերժվել «Քարենսի Էյ Էմ»-ի դիմումը

ՀՀ Կենտրոնական բանկը տեղեկացնում է, որ «Քարենսի Էյ Էմ» ՍՊԸ-ն 3 անգամ՝ 02.08.2017թ., 10.10.2017թ. եւ 16.10.2018թ., դիմել է ԿԲ՝ արտարժույթի դիլերային-բրոքերային առուվաճառքի լիցենզիա ստանալու խնդրանքով, եւ բոլոր դեպքերում դիմումը մերժվել է։

ԿԲ հաղորդագրության համաձայն՝ ընկերության տնօրեն Վահագն Գրիգորյանի հետ 3 անգամ կազմակերպվել է հանդիպում, որի ժամանակ ԿԲ մասնագետները փորձել են ստանալ լիարժեք տեղեկատվություն ընկերության բիզնես մոդելի, ռազմավարության, տեսլականի, ֆինանսական հոսքերի մասին, ինչպես նաեւ մատնանշվել են ընկերության կողմից թերի ներկայացված փաստաթղթերը եւ պարզաբանման ենթակա հարցերը, որոնց սակայն լուծում չի տրվել։

Ներկայացված դիմումները մերժվել են հետեւյալ հիմնավորումներով.

1. Ընկերության ներկայացրած փաստաթղթերում նկարագրված գործունեությունը չի համապատասխանել հայցվող լիցենզիայի գործունեությանը։ Մասնավորապես, ԿԲ ներկայացվել է արտարժույթի դիլերային-բրոքերային առուվաճառքի լիցենզիա ստանալու դիմում, սակայն ընկերության կողմից ներկայացված փաստաթղթերի փաթեթի ուսումնասիրությունից եւ տնօրենի հետ կայացած հանդիպման ընթացքում պարզվել է, որ ընկերությունը պատրաստվում է իրականացնել այլ գործունեություն, որը կարելի է վերագրել նաեւ արտարժույթի սակարկությունների կազմակերպմանը։

2. Ներկայացված փաստաթղթերի փաթեթը պարունակել է օրենքներին եւ այլ իրավական ակտերին հակասող դրույթներ, այդ թվում՝ սպառողների շահերի պաշտպանության տեսանկյունից։

3. Ընկերության կողմից ներկայացված իր գործընկերների վերաբերյալ տեղեկատվությունը լիարժեք չի բացահայտվել։

Նշված բոլոր հիմքերը մանրամասն նկարագրված են լիցենզիայի տրամադրումը մերժելու մասին ՀՀ ԿԲ խորհրդի որոշումների մեջ, որոնք սահմանված կարգով տրամադրվել են դիմումատուին։

«Ավելին, ԿԲ ուսումնասիրությամբ պարզվել է, որ ընկերության տնօրեն Վահագն Գրիգորյանը հանդիսանում է տնօրեն http://currencii.eu/ ինտերնետային հասցեով տեղակայված Currencii ընկերությունում։ Կայքում նշված է, որ ընկերությունը կարգավորվում է եւ լիցենզավորված է ՀՀ Կենտրոնական բանկի կողմից, որը, սակայն ապատեղեկատվություն է։ Սա մեկ անգամ եւս վկայում է ընկերության կողմից ոչ բարեխիղճ վարվելակերպ որդեգրելու մասին։

Կենտրոնական բանկը հարկ է համարում նաեւ անդրադառնալ հետեւյալին․

«Հայաստանի Հանրապետության Կենտրոնական բանկի մասին» ՀՀ Օրենքի համաձայն՝ Կենտրոնական բանկի հիմնական նպատակներն են ՀՀ-ում գների կայունության եւ ֆինանսական կայունության ապահովումը: Հաշվի առնելով Հայաստանի տնտեսության զգայունությունը արտարժույթի փոխարժեքի տատանումների նկատմամբ՝ ֆինանսական կայունության նպատակի ապահովման համար առաջնային նշանակություն ունի արդյունավետ արժութային քաղաքականության իրականացումը: «Հայաստանի Հանրապետության Կենտրոնական բանկի մասին» ՀՀ օրենքի համաձայն Հայաստանի Հանրապետությունում արժութային քաղաքականությունը իրականացնում է ՀՀ Կենտրոնական բանկը:

Այդ քաղաքականության շրջանակում Կենտրոնական բանկը սահմանում է շուկայի մասնակիցների լիցենզավորման, ընթացիկ գործունեության կարգավորման եւ վերահսկողության կանոններ: Արժութային շուկայի կարգավորումները ոչ միայն լիցենզավորված գործունեության համար պարզապես կանոններ են, այլ նաեւ ապահովում են արժութային շուկաների կայունությունը: ՀՀ Կենտրոնական բանկը նշված կանոնակարգումների միջոցով ապահովում է գների ու ֆինանսական կայունության իր հիմնական խնդիրները` զսպելով արժութային շուկայում չարաշահումները եւ զերծ պահելով ֆինանսական համակարգը արժութային շոկերից: Նման մոտեցումն ուղղված է նախեւառաջ շոկային իրավիճակներում հասարակության լայն զանգվածների շահերի պաշտպանությանը:

Ուսումնասիրելով արժութային դիլեր-բրոքերների գործունեության միջազգային փորձը եւ այդ ոլորտում տեղի ունեցող զարգացումները՝ Կենտրոնական բանկը որդեգրել է քաղաքականություն հնարավորինս սահմանափակել շուկայի մասնակիցների կողմից չարաշահումների ռիսկը: Ինչ վերաբերում է արտարժույթի դիլերային-բրոքերային առուվաճառքի լիցենզիա ունեցող շուկայի մասնակիցներին, ապա հայտնում ենք, որ ներկայումս արժութային շուկայում նման լիցենզիա ունեցող անձինք չկան, իսկ մոտ ապագայում Կենտրոնական բանկը նախատեսում է ընդհանրապես վերացնել լիցենզիայի այդ տեսակը: Նման սահմանափակող մոտեցում կիրառվում է արժութային շոկերի նկատմամբ զգայուն շուկաներ ունեցող շատ երկրներում եւ ուղղված է ֆինանսական շուկայի կայունության ապահովմանը եւ սպառողների լայն զանգվածի շահերի պաշտպանությանը չարաշահումների ռիսկերից:

Բացի այդ, հարկ է նշել, որ նման մոտեցման պարագայում ծառայության հասանելիությունը սպառողների տարբեր խմբերին որեւէ կերպ չի սահմանափակվի, քանի որ նշված ծառայությունները մատուցվում են շուկայում գործող այլ ֆինանսական կազմակերպությունների կողմից՝ ինչպես մասնաճյուղային լայն ցանցի, այնպես էլ օնլայն ծառայությունների միջոցով»,- ամփոփել են ԿԲ-ում:

Itel.am-ը հիշեցնում է, որ Currencii-ն արտարժույթի օնլայն փոխանակման հարթակ է, որը թույլ է տալիս շուրջ 10 անգամ խնայել արտարժույթ փոխանակելու գործընթացում:

Համակարգում ներկայացված է երկու կողմ՝ գնորդ եւ վաճառող: Currencii կողմերի համար ծառայում է որպես կամուրջ, գեներացնում բոլոր պահանջները, հետո յուրաքանչյուր կողմին փոխանցում իրեն հասանելիք գումարը: Կողմերն իրար չեն տեսնում, ինչն արված է անվտանգությունից ելնելով, որպեսզի իրար չխաբեն:

Currencii-ն 2018թ. դարձել է էստոնական Startup Wise Guys աքսելերատորի շրջանավարտ: Ընկերությունը ներկայում գործունեություն է ծավալում Լատվիայում եւ Էստոնիայում։ Առաջիկայում այն կսկսի աշխատել նաեւ Լեհաստանում։