Հայկական ՏՏ-ի շանսերը Իրանում

Հունվարի 16-ին Վիեննայում ԱՄՆ պետքարտուղար Ջոն Քերրին եւ ԵՄ արտաքին քաղաքականության եւ անվտանգության հարցերով գերագույն հանձնակատար Ֆեդերիկա Մոգերինին հայտարարեցին Իրանի դեմ սահմանված պատժամիջոցների չեղարկման մասին:

Պատժամիջոցների վերացումը լավ հնարավորություն է Հայաստանի տնտեսության մի շարք ճյուղերի, այդ թվում՝ տեղեկատվական եւ բարձր տեխնոլոգիաների համար` մուտք գործելու իրանական շուրջ 80-միլիոնանոց շուկա:

Հայկական տեխնոլոգիական այն ընկերությունների համար, որոնց թիրախը արտերկիրն է, Իրանն ունի ներուժ՝ դառնալու ինչպես թեստավորման վիթխարի շուկա, այնպես էլ զարգացման լավ հարթակ, որտեղ օտարերկրյա մրցակիցները դեռ այնքան էլ շատ չեն:

Ըստ տվյալների՝ Իրանի 81 մլն բնակչության կեսն ունի սմարթֆոն: Նախատեսվում է, որ այս տարվա մարտին սմարթֆոն օգտագործողների թիվը կկրկնապատկվի: Սա նշանակում է, որ շուկայում տեխնոլոգիական մյուս պրոդուկտներին զուգահեռ պահանջարկը եւ հետաքրքրությունը կմեծանա նոր մոբայլ հավելվածների նկատմամբ:


Ֆեդերիկա Մոգերինին եւ Իրանի արտաքին գործերի նախարար Մոհամադ Ջավադ Զարիֆը Վիեննայում հունվարի 16-ին
Լուսանկարը՝ Reuters

Ինչո՞ւ ներկայացված չլինել այս շուկայում, հատկապես, երբ կա դրա ներուժը: 

Իրանը եւ հայկական ՏՏ ընկերությունները

Itel.am-ը զրուցել է հայկական մի քանի ՏՏ ընկերությունների հետ՝ փորձելով պարզել, թե որքանով են նրանք հետաքրքրված իրենց արտադրանքն իրանական շուկայում ներկայացնելու հարցում:

Zangi ընկերությունը՝ համանուն մոբայլ հավելվածով, այսօր ունի շուրջ 400 հազ. ներբեռնում, որից շուրջ 5000-ը՝ Իրանից:

«Մեր ընկերությունը միշտ էլ հետաքրքրված է եղել Իրանով: Պետք է նշել, որ Zangi-ն այնտեղ օրգանիկ ձեւով է տարածվում՝ առանց միջամտության»,- նշում է Zangi թիմի անդամ Արթուր Ավետիսյանը:

Ենթադրվում է, որ Իրանից օգտվողների մեծ մասը տեղի հայերն են կամ Հայաստանում բնակվող իրանցիների բարեկամները:

«Zangi-ն հնարավորություն է տալիս նույնիսկ շատ թույլ ինտերնետի դեպքում բարձրորակ վիդեո եւ աուդիո զանգեր իրականացնել, փոխանակվել ինտերակտիվ հաղորդագրություններով, լուսանկարներով եւ տեսանյութերով: Իսկ Իրանում առկա ինտերնետային խնդիրների պարագայում սա շատ ակտուալ խնդիր է լուծում»,- ընդգծում է Արթուր Ավետիսյանը:

gg ընկերությունը, որն օրերս ggGeorgia բրենդով սկսեց գործել նաեւ Թբիլիսիում, նախատեսում է այս տարի մուտք գործել նաեւ իրանական շուկա:

«Ուշացնել չի կարելի, եւ ցանկալի է շուկա մուտք գործել տարվա առաջին կեսին: Անձամբ հորդորում եմ բոլոր հայ գործարարներին, որոնք ունեն մրցունակ պրոդուկտներ, շատ լուրջ վերաբերվել իրանական շուկային՝ հնարավորինս արագ հաստատվելով այնտեղ»,- շեշտում է gg-ի համահիմնադիր Խաչատուր Գրիգորյանը:

Նա նշում է, որ Թեհրանից բացի՝ իրենք նպատակ ունեն մուտք գործել իրանական մյուս քաղաքներ, առաջին հերթին՝ Թավրիզ:

Մարդկային ռեսուրսների կառավարումը դյուրացնող Teamable հայկական ընկերությունը եւս հետաքրքրված է իրանական շուկա մուտք գործելու հեռանկարով:

«Իրանը մեզ համար շատ հետաքրքիր շուկա է, քանի որ մոտ ապագայում բուռն աճելու է: Դեռ հստակ չենք ծրագրել, թե երբ կլինի մեր մուտքն այդ շուկա, քանի որ նախ հարկավոր է համակարգին «պարսկերեն սովորեցնել»»,- նշում է ընկերության համահիմնադիր Վազգեն Հակոբջանյանը:
 
Ընկերներին անկեղծ եւ անանուն «խոստովանություններ» անելու հնարավորություն ընձեռող Truthly նախագծի հիմնադիրներից Հրաչյա Մանուկյանն էլ նշում է, որ Իրանի հետ կոնկրետ պլաններ այս պահին չունեն:

«Մեզ մոտ հաջորդ թիրախային շուկան Ռուսաստանն է, հետո եվրոպական երկրները: Դրանից հետո միայն կարելի է մտածել Իրանի մասին»,- ասում է նա:

Իրանական շուկայում նորարարական լուծումների պակաս կա

«Ստարտափ Armenia» կազմակերպության հիմնադիր Հայկ Ասրիյանցն Իրանը հայկական ՏՏ-ի համար բավական գրավիչ շուկա է համարում:


Լուսանկարը՝ ERIC LAFFORGUE PHOTOGRAPHY

«Իրանի տնտեսությունը, ըստ Համաշխարհային բանկի նախնական տվյալների, աշխարհում 28-րդն է, իսկ ՀՆԱ-ն կազմում է ավելի քան $425 մլրդ: Ընդ որում, 80-միլիոնանոց բնակչության միայն 4-6%-ն է համարվում աղքատ (եթե աղքատության շեմը համարենք օրական $2.5-3.5 ծախսեր ունենալը): Միեւնույն ժամանակ, Իրանը դեռ 2014թ. առանձնանում էր գործազրկության բարձր ցուցանիշով՝ 11.4%, թեեւ կառավարությունը նախատեսել է նոր աշխատեղեր ստեղծելու միջոցով այս տարի իջեցնել ցուցանիշը մինչեւ 7%»,- նշում է նա:

Հայկ Ասրիյանցն ուշադրություն է հրավիրում այն հանգամանքի վրա, որ Իրանում դեռ արգելված եւ արգելափակված են բազմաթիվ արտասահմանյան ՏՏ հարթակներ եւ պրոդուկտներ:

«Սա ստիպել է տեղացի ձեռներեցներին մշակել դրանց իրանական տարբերակները, մինչդեռ շուկայում կա նորարարական լուծումների պակաս: Արդյունքում ստեղծվել է հետաքրքիր մրցակցային միջավայր, որտեղ, կարծում եմ, հայկական ընկերությունները կարող են մեծ հաջողությունների հասնել»,- ընդգծում է նա:

Հայկ Ասրիյանցի խոսքով՝ դեպի Իրան նոր կամուրջներ կառուցելու համար հարկավոր է ճիշտ օգտագործել հայ-իրանական առեւտրատնտեսական եւ մշակութային կապերը, Հայաստանում բնակվող պարսկահայերին եւ Իրանի հայկական համայնքը:

Իրանում մոբայլ գեյմերների 78%-ը նախընտրում է անգլերեն ինտերֆեյսը

Վերջերս Իրանում մոբայլ գեյմինգի վերաբերյալ հետաքրքիր թվեր էր հրապարակել Techcrunch-ը: 837 իրանցի մոբայլ գեյմերների շրջանում անցկացված օնլայն հարցման նպատակն էր հասկանալ երկրում տիրող իրավիճակը:

Իրանի 81-միլիոնանոց բնակչության մեծամասնությունը (60%) մինչեւ 30 տարեկան են: Հետեւաբար, մոբայլ խաղեր խաղացողների 67%-ը մինչեւ 24 տարեկան են:

Ընդ որում, հարցվածների 78%-ը խաղերը նախընտրում է խաղալ ոչ թե պարսկերենով, այլ անգլերենով:

67%-ը մոբայլ խաղերից օգտվում է օրվա մեջ մի քանի անգամ՝ կարճ ժամանակով, իսկ 19%-ը՝ օրական 3 ժամից ավելի: 84%-ն օգտագործում է Android, իսկ 13%-ը՝ iOS սարքեր:

Խաղերի ընտրության հարցում առաջատար գործոններն են ընկերների/ ծանոթների խորհուրդները (52%), հավելվածի վարկանիշը (47%), ԶԼՄ-ների անդրադարձը (28%): Խաղերի ամենատարածված ժանրերն են էքշենը (52%) եւ ստրատեգիան (49%):

Տարվա ընթացքում թեմային անդրադարձ էր կատարել նաեւ The Guardian-ը: Վկայակոչելով պաշտոնական աղբյուրները՝ պարբերականը նշել էր, որ իրանցիների գոնե կեսն ունի սմարթֆոն:

 
Ինչ վերաբերում է ինտերնետ օգտագործողների թվին, ապա, ըստ Internet World Stats-ի տվյալների, Իրանն ունի 46.5 մլն ինտերնետ օգտատեր, ինչն ամբողջ Մերձավոր Արեւելքում ինտերնետ օգտագործողների շուրջ 40%-ն է: Սակայն ուշագրավ է, որ ոչ բոլորն Իրանում ունեն ինտերնետին կանոնավոր կերպով միացման հնարավորություն: 

Նարինե Դանեղյան