Teamable-ը սկսել է ծրագրային ապահովում տրամադրել Uber-ին եւ Lyft-ին

Մարդկային ռեսուրսների կառավարումը դյուրացնող Teamable հայկական ընկերությունը սկսել է ծրագրային ապահովում տրամադրել ամերիկյան Uber եւ Lyft ընկերություններին: Առաջիկայում կսկսեն համագործակցել նաեւ Yahoo-ի հետ:

Այս մասին ԴիջիԹեք Էքսպոյի շրջանակում Itel.am-ին այսօր տեղեկացրել է Teamable-ի համահիմնադիրներից Մերուժան Դանիելյանը:

Նա նշել է, որ համագործակցությունը սկսել են մոտ մեկ ամիս առաջ:

«Ներկայում աշխատում ենք տվյալ ընկերությունների փոքր խմբերի հետ, սակայն նախատեսում ենք ժամանակի ընթացքում մեծացնել համագործակցությունը»,- ասել է Մերուժան Դանիելյանը:

Նա տեղեկացրել է, որ հայաստանի շուկան եւս հետաքրքրված է իրենց ծառայություններով:

«Վերջերս մեր հաճախորդների թվում ավելացել են Workfront եւ SFL ընկերությունները: Առաջիկայում կսկսենք համագործակցել նաեւ Macadamian-ի հետ»,- եզրափակել է նա:

Teamable-ի մասին առավել մանրամասն կարող եք կարդալ այստեղ: