Հայտնի են IBM BlueMix cloud հաքաթոնի երկու հաղթողները

Հուլիսի 11-ին եւ 12-ին Երեւանում կայացած տեխնոլոգիական ուիքենդի շրջանակում 11 հայկական թիմ մասնակցել է IBM BlueMix cloud հաքաթոնին:

Դրանցից երկուսը` Vulpex-ը եւ Simplex-ը, ժյուրիի կողմից ճանաչվել են լավագույնը՝ յուրաքանչյուրն արժանանալով 500-հազարական դրամ մրցանակի: Խրախուսական մրցանակի՝ երկու սմարթֆոնի է արժանացել Brainstorm թիմը:

Միջոցառման կազմակերպիչը Ձեռնարկությունների ինկուբատոր հիմնադրամն էր՝ IBM Ինովացիոն լուծումների եւ տեխնոլոգիաների կենտրոնի շրջանակում: Հովանավորներն էին «Նիկիտա Մոբայլ», «Ռոստելեկոմ Հայաստան» ընկերությունները եւ «Զանգեզուրի պղնձամոլիբդենային կոմբինատ» բարեգործական հիմնադրամը: 
 
«Ուրախալի է, որ չնայած երիտասարդ տարիքին՝ բոլոր մասնակիցները հետաքրքիր եւ նորարարական լուծումներով հանդես եկան եւ IBM Bluemix պլատֆորմն էլ ավելի լայն հնարավորություններ ընձեռեց նրանց՝ սեփական գաղափարները ծրագրավորելու եւ ներկայացնելու հարցում»,- նշել է «Ռոստելեկոմ Հայաստան»-ի գլխավոր տնօրեն Հայկ Ֆարամազյանը:

«Շատ հետաքրքիր մրցույթ էր, ինչը թիմերին դրդում էր էլ ավելի ջանասիրաբար աշխատել ու արդյունքում լուրջ մրցակցություն էր ընթանում: Առհասարակ, cloud պլատֆորմի վրա հիմնված հաքաթոնը միշտ ստիպում է թիմին նոր ուղղությամբ մտածել ու զուգահեռաբար ձեռք բերել նաեւ նոր գիտելիքներ»,- իր հերթին ասել է Simplex թիմի անդամ Նաիրի Նարինյանը: 

Նշենք, որ Simplex-ը մշակել էր սոցիալական երաժշտական հարթակ, որտեղ ստեղծվող երաժշտությանը կարող էին մասնակից լինել աշխարհի ցանկացած կետում գտնվող ոչ պրոֆեսիոնալ երաժշտության սիրահարները։