Beeline-ում այսօր «Հաճախորդների օր» է

Beeline-ը այսօր հայտարարել է «Հաճախորդների օր», որի շրջանակում ընկերության ղեկավար անձնակազմը վաճառքի եւ սպասարկման գրասենյակներում ամբողջ օրվա ընթացքում աշխատում է բաժանորդների հետ:

Հաճախորդների սպասարկման որակի բարձրացման հետ կապված ռազմավարությունը Beeline-ը որդեգրել է 2013թ. աշնանը, որի շրջանակում մի շարք միջոցառումներ են իրականացվել:

Այդ միջոցառումներից է, օրինակ, հարցումների անցկացումը՝ NPS (Net Promoter Score), որն այս պահին իրականացվում է SMS հաղորդագրության միջոցով:

Հայաստանում Beeline-ի գլխավոր տնօրեն Անդրեյ Պյատախինը լրագրողների հետ զրույցում ասել է, որ ցանկացած բաժանորդ, որը գործարք է կատարում Beeline վաճառքի եւ սպասարկման գրասենյակներում կամ զանգահարում հաճախորդների սպասարկման կենտրոն, ստանում է SMS հաղորդագրություն: Դրա միջոցով բաժանորդը 0-ից 10-բալանոց սանդղակով գնահատում է ընկերության  ծառայությունները: Նրա խոսքով՝ NPS համակարգը թույլ է տալիս հասկանալ, թե ինչպես սպասարկել բաժանորդներին:

«Ավելի քան 2500 աշխատակից յուրաքանչյուր օր եւ յուրաքանչյուր ժամ աշխատում է Beeline բաժանորդների համար՝ նպատակ ունենալով մեր կողմից մատուցվող ծառայությունները դարձնել հնարավորինս պարզ եւ հարմար, եւ ցուցաբերել անհատական մոտեցում յուրաքանչյուր բաժանորդի: Այսօր դեռեւս շատ հարցեր կան, որոնք ունեն բարելավման կարիք, սակայն մենք շարունակաբար աշխատում ենք այդ ուղղությամբ եւ կշարունակենք աշխատել այնքան ժամանակ մինչեւ կդառնանք ամենահաճախորդամետ օպերատորը շուկայում»,- հայտարարել է Անդրեյ Պյատախինը:

«Անցած տարվա հոկտեմբեր-նոյեմբեր ամիսներին հարցումների շրջանակում մեզ պատասխանող SMS-ների թիվը չէր գերազանցում 4000-ը, արդեն դեկտեմբերին այդ սահմանն անցանք, իսկ այս տարվա հունվարին խոսքը գնում էր արդեն ավելի քան 5000 SMS-ի մասին: Ընդամենը 3 ամսում SMS-ների թիվը 1/3-ով ավելացել է, ինչը մեզ համար շատ հուսադրող է»,- ասել է Beeline-ի հաճախորդների սպասարկման որակի բարելավման նախագծի ղեկավար Շուշանիկ Ղալթաղչյանը:

Beeline-ում նշել են, որ վերջին 6 ամիսների ընթացքում բարեփոխվել են ավելի քան տասնյակ ընթացակարգեր, վերացվել են հաշիվների լիցքավորման ժամկետները, գրասենյակներում ավելացել է սպասարկման որակի վերահսկողությունը, նվազել են հերթերը, հաճախորդների սպասարկման կենտրոնում ավելացել է սպասարկման որակի վերահսկողությունը, նվազել է զանգի սպասելաժամանակը: