Yahoo-ն $30 մլն-ով գնել է 17-ամյա բրիտանացու ստեղծած հավելվածը

Ամերիկյան վեբ-հսկա Yahoo-ն $30 մլն-ով գնել է բրիտանացի 17-ամյա ուսանող Նիք Դ’Ալոսիոյի կողմից ստեղծված Summly բջջային հավելվածը, հաղորդում է RBC-ն:

Հավելվածն օգտագործվում է iPhone-ների վրա եւ իրենից ներկայացնում է տարբեր լրատվական աղբյուրների ագրեգատոր: Հավելվածն օգտագործում են, մասնավորապես, միլիարդատեր Ռուպերտ Մերդոքը եւ Ջոն Լենոնի այրի Յոկո Օնոն:

Մեկնաբանելով իր հավելվածի վաճառքը` երիտասարդն ասել է, որ պատրաստվում է ներդնել Summly-ի վաճառքից ստացված գումարները նոր նախագծերում, թեեւ իր տարիքը որոշակի խոչընդոտներ է ստեղծում գումարն ազատ տնօրինելու համար:

Դ’Ալոսիոն ծրագրավորում է սովորել 12 տարեկանից, երբ գործարկվել է Apple-ի AppStore-ը: Summly-ից բացի նա ստեղծել է այնպիսի հավելվածներ, ինչպես Facemoods-ը, որը թույլ է տալիս նկարներով որոշել Facebook-ի օգտատերերի տրամադրությունը, եւ երաժշտության որոնող հավելված SongStumblr-ը: