Սկսնակ IT ընկերություններն առաջարկում են մենեջմենթի դասընթացներ մտցնել տեխնիկական բուհերի ուսումնական ծրագրերում

#UITE #Start-up #ընկերություններ

Երեւան /Մեդիամաքս/. ՀՀ սկսնակ IT ընկերությունները վենչուրային ֆինանսավորման եւ հարկային արտոնությունների կարիք ունեն:

Ինչպես հաղորդում է ՄԵԴԻԱՄԱՔՍ-ը, այդ հարցերը բարձրացվել են այսօր Երեւանում կայացած Start-up ֆորումում, որը կազմակերպվել էր ՀՀ IT ձեռնարկությունների միության (UITE) կողմից: Սկսնակ IT ընկերությունների ներկայացուցիչները թվել են ընկերությունների գրանցման գործընթացի բարդությունները եւ UITE-ին դիմել են ընկերություններին հաշվապահական հաշվառում վարելու գործում իրենց օգնելու խնդրանքով:

Ֆորումում նշվել է նաեւ, որ IT ընկերությունների հիմնադիրները հաճախ հանդիսանում են տեխնիկական կրթություն ունեցող երիտասարդները, ովքեր չունեն փորձ եւ կառավարման անհրաժեշտ հմտություններ: Այդ համատեքստում ընդգծվել է տեխնիկական բուհերի ուսումնական ծրագրերում մենեջմենթի դասընթացներ մտցնելու անհրաժեշտությունը:

UITE-ի նախագահ Հովհաննես Ավոյանը նշել է Հայաստանում նոր ընկերություններ հիմնելու ավանդույթի կայացման եւ նոր ու համարձակ գաղափարների առաջխաղացման կարեւորությունը:

«Գլխավորը հասարակության մեջ հոգեբանական մթնոլորտն է: Ամբողջ աշխարհում սկսնակ IT ընկերությունների 80%-ը հաջողության չի հասնում, եւ հասարակությունը պետք է սովորի նորմալ վերաբերվել դրան», - ասել է նա: