Apple-ի կայքում հայտնվել է «Severance» սերիալի Lumon Terminal Pro համակարգիչը

Apple TV+ ալիքով հեռարձակվող «Severance» սերիալից հայտնի համակարգչի՝ Lumon Terminal Pro-ի էջը ավելացվել է Apple-ի Mac համակարգիչների բաժնում՝ «Նորույթ» նշումով։

Նմանատիպ սարքեր էին օգտագործում «Severance»-ի գլխավոր հերոսները՝ մակրոտվյալների մշակման բաժնի աշխատակիցները։

«Մարդիկ խելահեղ գումարներ կտային նման համակարգչի համար... Ես էլ բացառություն չեմ», — գրել է Reddit-ի օգտատերերից մեկը։ Շատերը համաձայն են՝ խոստովանում են, որ մեծ հաճույքով կօգտագործեին այդ համակարգիչը կամ գոնե նրա ստեղնաշարն ու թրեքբոլը։

«Severance»-ը Apple TV+-ի օրիգինալ նախագիծն է։ Երկրորդ սեզոնը ավարտվեց մարտի 21-ին։ Նույն օրը սերիալը երկարաձգվեց երրորդ սեզոնի համար։

Սերիալի գործողությունները տեղի են ունենում Lumon Industries կորպորացիայում, որը ստեղծել է «բաժանման» ծրագիրը․ վիրաբուժական միջամտության միջոցով այն մասնակիցների հիշողությունները բաժանում է անձնականի եւ աշխատանքայինի։

photo © Apple

Արդյունքում ձեւավորվում են երկու անհատականություն՝ արտաքին («աութի»), որը չի հիշում գրասենյակային կյանքը, եւ ներքին («իննի»), որը չի հիշում կյանքի ոչ աշխատանքային մասը։

«Severance»-ը դարձել է Apple TV+-ի ամենադիտված սերիալը, գրավել է երկրպագուների ուշադրությունը համանուն ընկերությունների նկատմամբ, նաեւ փոխել աշխատանքային եւ անձնական կյանքի հավասարակշռության թեմայով քննարկումները։

Սերիալի գովազդում նկարահանվել է նաեւ Apple-ի ղեկավար Թիմ Քուկը, իսկ դերասանները, երկրորդ սեզոնի պրեմիերայից առաջ, Նյու Յորքի Կենտրոնական կայարանում վերակենդանացրել էին իրենց հերոսների կյանքի փոքրիկ տեսարանները։