ԳՏՏԿ-ն մեկնարկում է ծրագրավորման անվճար դասընթացներ Տավուշի մարզում

Գյումրիի Տեղեկատվական Տեխնոլոգիաների Կենտրոնը (ԳՏՏԿ) մեկնարկում է Տավուշի մարզի երիտասարդների զբաղվածության ապահովմանն ուղղված ծրագիր:

Նախատեսվում է անցկացնել ծրագրավորման, ինչպես նաեւ փափուկ հմտությունների դասընթացներ մարզի երիտասարդների համար:

Մասնավորապես, 42 շահառու հնարավորություն կստանա մասնակցելու 6-ամսյա անվճար դասընթացների հետեւյալ թեմաներով`

•    Համակարգչային տեխնիկա/հիմնական հմտություններ,
•    Վեբ ծրագրավորում (HTML / CSS / JavaScript),
•    Սոցիալական մեդիա մարքեթինգ (SMM)
•    Գրաֆիկ դիզայն (Graphic Design):

Ծրագրի շնորհիվ մասնակիցները ձեռք կբերեն նաեւ նոր ծանոթություններ ՏՏ ընկերությունների եւ ԳՏՏԿ գործընկեր կազմակերպությունների շրջանում` ընդլայնելով հետագայում աշխատանք գտնելու իրենց հնարավորությունները:

ԳՏՏԿ տնօրեն Ամալյա Եղոյանի խոսքով` Իջեւանում այս պահին գործող ՏՏ ընկերություններն ունեն մասնագետների կարիք, իսկ այս ծրագիրը կարող է լրացնել այդ բացը` պոտենցիալ մասնագետներ պատրաստելով այդ ընկերությունների համար:

Ծրագիրը Գյումրիի Տեղեկատվական Տեխնոլոգիաների Կենտրոնն իրականացվում է HSBC Բանկի աջակցությամբ։