BAJ Unicorn ակադեմիան մեքենայական ուսուցման ինժեներներ կպատրաստի

«Orion»-ի եւ «BAJ Accelerator»-ի նախաձեռնությամբ Հայաստանում մեկնարկել է «BAJ Unicorn Academy» ծրագիրը, որի առաջին դասընթացում մեքենայական ուսուցման  ինժեներներ կպատրաստվեն։

Ծրագիրն իրագործում է Armenian Code Academy-ն (ACA)՝ «Embodied» եւ «cognaize» ընկերությունների ֆինանսավորմամբ։  

Կրթությունն  ուսանողների համար անվճար է, ուսումը կտեւի 5 ամիս` 20 ընտրված շրջանավարտներով։

«Հայաստանում ավագ մասնագետների պակաս կա։ Հետագա տարիներին ՏՏ ընկերությունները շարունակելու են արագ զարգանալ, հետեւաբար, մասնագետների կարիք ավելի շատ է լինելու։ Որոշեցինք խնդիրը լուծել կրթության եւ միջազգային չափանիշներով փորձառության հնարավորություն ստեղծելու միջոցով: Հաջողության դեպքում ուսանողների եւ ծրագրերի քանակը կավելացնենք»,- նշել է «Orion Worldwide Innovations Armenia»-ի համահիմնադիր, տնօրեն Դիանա Արզումանյանը։

Դիանա Արզումանյանը եւ Հասմիկ Գալստյանը
photo © BAJ Unicorn ակադեմիա

«Մեքենայական ուսուցման բարձրակարգ ինժեներներ պատրաստելու համար հրավիրել ենք դասախոսների աշխարհի առաջատար ընկերություններից եւ համալսարաններից։ Դասախոսներ ունենք Արիզոնայի համալսարանից, Google-ից եւ այլ միջազգային ընկերություններից»,- նշել է Armenian Code Academy-ի համահիմնադիր, տնօրեն Նարեկ Ասլիկյանը։

Նարեկ Ասլիկյանը
photo © BAJ Unicorn ակադեմիա

Լավագույն ուսանողներն աշխատանքի առաջարկ կստանան «Embodied» եւ «cognaize» ստարտափներից, որոնք երկուսն էլ մեծ հաջողություններ են արձանագրել համաշխարհային շուկայում եւ ներկայում ակտիվորեն համալրում են հայաստանյան թիմերը։

«Օրիոնը» (Orion Worldwide Innovations) ստարտափների աճի եւ փոխկապակցված էկոհամակարգի զարգացման հանգույց է, որն առաջարկում է ծառայությունների ամբողջական փաթեթ: «Օրիոնը» ներդրումների ենթակա ընկերությունների համար ստեղծում է ԱՄՆ մուտք գործելու հնարավորություններ, բարելավում այդ ընկերությունների՝ հաճախորդներ ձեռք բերելու ռազմավարությունները, օգնում մնալ մրցունակ եւ պաշտպանում իրենց նորարարությունները։

«BAJ Accelerator»-ը աճն արագացնող ծրագիր է, որը նախատեսված է «Seed»-ից «Series A+» փուլերի ստարտափների համար:

Armenian Code Academy-ն տեխնոլոգիական կրթության առաջատար հաստատություն է՝ հիմնադրված Երեւանում։ Վերջին վեց տարիների ընթացքում ACA-ն առաջարկում է բարձրորակ կրթական ծրագրեր։