Եվգենի Գոլանդ. DataArt-ի եւ SFL-ի միավորումը 2+2=5 շարքից է

Նախորդ շաբաթ հայտնի դարձավ DataArt-ի կողմից հայկական SFL ծրագրային ապահովման մշակման ընկերության ձեռքբերման մասին: Գործարքի կնքումից հետո Itel.am-ը զրուցել է DataArt ընկերության նախագահ Եվգենի Գոլանդի, DataArt-ի հայաստանյան գրասենյակի ղեկավար Արսեն Բաղդասարյանի եւ SFL ընկերության տնօրեն Արսեն Գեւորգյանի հետ:

Միավորում՝ 2+2=5 սկզբունքով

DataArt-ը, միավորվելով SFL-ի թիմի հետ, Հայաստանում շատ կարեւոր ռազմավարական դիրք է ձեռք բերում, ասել է DataArt-ի նախագահ Եվգենի Գոլանդը:

«Այս միավորումը մեզ համար 2+2=5 շարքից է: Հայաստանը IT talent-ի տեսանկյունից շատ հետաքրքիր շուկա է, իսկ SFL-ը շուկայի առաջատարներից է: Այս ընկերությունն ունի հրաշալի հաճախորդներ, հրաշալի թիմ, ճիշտ սկզբունքներ ու DataArt-ի հետ համատեղելի մշակույթ», - ասել է Գոլանդը:

Եվգենի Գոլանդը
photo © Մեդիամաքս

Նա նշել է՝ հայկական շուկան իրենց ընկերության համար ռազմավարական նշանակություն ունեցողներից է: Այս առումով DataArt-ը կարեւորում է հայաստանյան ՏՏ ոլորտի զարգացումը՝ սերտորեն համագործակցելով նաեւ կրթական ոլորտի հետ:

«ՏՏ ծառայությունների պահանջարկը ոչ միայն մեծանում է, այլեւ արագանում: Աճող կադրերի, համալսարանների հետ աշխատանքը, զարգացման ամենաառանցքային ուղղություններից է», -  ասել է Եվգենի Գոլանդը:  

Մեկ կարգախոս, մեկ թիմ

«Մենք աշխատում ենք իրար շատ մոտ կարգախոսներով ու սկզբունքներով», - նկատում է DataArt-ի փոխնախագահ, Հայաստանի եւ Վրաստանի բիզնես քլաստերի ղեկավար Արսեն Բաղդասարյանը:

Արսեն Բաղդասարյանը
photo © Մեդիամաքս

«15 տարի գործելով հայկական շուկայում՝ SFL-ը DataArt-ին շատ մոտ մշակույթ ունի, որի առանցքը մարդկային հարաբերություններն են: «Մարդն՝ առաջին տեղում», սա մեր կարգախոսն է, որին շատ նման, մի փոքր այլ ձեւակերպմամբ կարգախոսով աշխատում էր նաեւ SFL-ը: Այսուհետ՝ չկա որեւէ տարբերություն, մենք մի թիմ ենք, մենք DataArt Հայաստանն ենք», - ասել է Արսեն Բաղդասարյանը:

Ուժերը համատեղելով՝ կառուցել ամենամեծ կենտրոնը

Միավորելով DataArt-ի եւ SFL-ի ներուժը՝ հնարավորություն է ստեղծվում Երեւանում կառուցել DataArt-ի՝ ծառայություններ մատուցող ամենամեծ կենտրոնը, ասել է SFL ընկերության տնօրեն Արսեն Գեւորգյանը:

«DataArt-ի ռեսուրսների ու մեծ եւ հետաքրքիր նախագծերին հասանելիությունը եւ SFL-ի ինժեներական ներուժի միավորումը լավ արդյունքների կբերի», - նշել նա:

Արսեն Գեւորգյանը
photo © Մեդիամաքս

Արսեն Գեւորգյանի խոսքով՝ կորոնավիրուսի համավարակից հետո շուկան փոխվել է, եւ այս կոնսոլիդացիան հնարավորություն է տալիս համապատասխանել փոխված շուկայի միտումներին, հաճախորդներին ավելի արագ ու ավելի որակյալ ծառայություններ մատուցել:

«Այս միավորումը համարում ենք մեծ հաջողություն: Կարեւոր գնահատական է, որ նման խոշոր միջազգային կազմակերպությունը հետաքրքրվում է մեր ընկերությամբ, մեր որակով, աշխատանքի մշակույթով: Շնորհակալություն եմ հայտնում SFL-ի ամբողջ թիմին, այս հաջողությունը հենց թիմի աշխատանքի արդյունքն է», - ասել է Արսեն Գեւորգյանը:

Յանա Շախրամանյան