ԴիջիԹեք-ում Joomag-ը կսովորեցնի օգտվել իր բիզնես լուծումներից

Սեպտեմբերի 29-ից հոկտեմբերի 1-ը անցկացվելիք 13-րդ ամենամյա ԴիջիԹեք տեխնոլոգիական ցուցահանդեսում Joomag ընկերությունը կներկայացնի իր բիզնես լուծումները:

Itel.am-ին ընկերությունում պատմել են, որ Joomag-ի ներկայացուցիչները 9 վորքշոփերի ընթացքում կսովորեցնեն, թե ինչպես Joomag-ի բիզնես լուծումների օգնությամբ ստեղծել, տարածել, վաճառել ցանկացած թվային ինտերակտիվ կոնտենտ՝ ամսագրեր, կատալոգներ, էլեկտրոնային գրքեր, եւ հետեւել դրանց՝ խթանելով բիզնեսի զարգացումը եւ օպտիմիզացնելով գործընթացները։

Հարկավոր է գրանցվել այստեղ՝ ընտրելով նախընտրելի օրն ու ժամը:

«Մեր գործիքներով նաեւ կարող են ձեւավորել եւ ավելի ինտերակտիվ դարձնել արդեն ունեցած նյութը: Օրինակ, ներբեռնելով պարբերականը մեզ մոտ՝ հնարավորություն կունենաք օնլայն խմբագրիչի միջոցով հարստացնել այն տեսահոլովակներով, ձայնային էֆեկտներով, երաժշտությամբ, անիմացիայով, տեսադարան ստեղծելով, հղումներ տեղադրելով եւ այլն»,- տեղեկացրել է Joomag-ի Կենտրոնական եւ Արեւելյան Եվրոպայի գծով տարածաշրջանային տնօրեն Տիգրան Բադալյանը:

Այս տարի ԴիջիԹեքի կատալոգը կազմվելու է հենց Joomag հարթակում: Սրա նպատակը, ըստ Տիգրան Բադալյանի, Հայաստանի թվայնացման գործընթացում սեփական լուման ներդնելու ցանկությունն է:

Joomag-ը բոլորը մեկում հարթակ է, որն առաջարկում է համակողմանի լուծումներ մեծ եւ փոքր բիզնեսներին՝ կոնտենտ մարքեթինգի, թվային հրատարակչության, վաճառքի խթանման եւ կորպորատիվ հաղորդակցության պահանջները բավարարելու համար։

Ընկերության հաճախորդների թվում են 500 հազ-ից ավելի մեծ եւ փոքր բիզնեսներ, այդ թվում՝ Huffington Post-ը, Cosmopolitan-ը, Elle-ը, Harper’s Bazaar-ը, Vogue-ը, Levi’s-ը, IBM-ը, KFC-ն:

Կարդացե՛ք «Աշխատանքն ու առօրյան Joomag-ում» այստեղ: