Google-ը դանդաղ ինտերնետով երկրներում թեստավորում է Search Lite-ը

Google-ը թեստավորում է Search Lite ծրագիրը՝ նախատեսված դանդաղ ինտերնետ ունեցող զարգացող երկրների օգտագործողների համար:

Android Police պարբերականի փոխանցմամբ՝ Search Lite-ը կունենա նույն հնարավորությունները, ինչ Google-ի սովորական տարբերակը՝ որոնում ձայնի եւ տեքստի միջոցով, թարգմանություններ, լուրերի ընթերցում եւ եղանակի տեսություն:

Ներկայում ծրագիրը հասանելի է միայն Ինդոնեզիայի բնակիչներին, որոնք ունեն Android սարքեր:

Մայիսին կայացած I/O կոնֆերանսի ժամանակ Google-ի գլխավոր տնօրեն Սունդար Պիչայը հայտարարել էր, որ աշխատում են Android օգտատերերի թիվը շեշտակի ավելացնելու ուղղությամբ: Դա հնարավոր կլինի անել այն երկրների բնակիչների հաշվին, որտեղ ինտերնետի արագությունը շատ թույլ է, հետեւաբար՝ փոքր է նաեւ սմարթֆոններից օգտվողների թիվը:

Google-ն այս տարվա փետրվարին գործարկել էր YouTube-ի օֆլայն տարբերակը:
Google-ի որոնման համակարգն աշխատում է նաեւ Android-ի թեթեւ տարբերակի՝ Android Go-ի վրա: