16:19 | 16.02.17 | Նորություններ | 24214

    «Թել-Սել»-ն ու Beeline-ը շարունակում են բանակցել

    «Թել-Սել» ընկերությունը տեղեկացնում է, որ Telcell վճարային տերմինալներով այսօրվանից հնարավոր չէ Beeline կապի ծառայությունների դիմաց կատարել վճարումներ:

    Ընկերությունը հայցում է հաճախորդների ներողամտությունը` պատճառված անհարմարության համար:

    «Սա Beeline ընկերության միակողմանի որոշումն է: Դադարեցվել է անգամ բանակցություններում չքննարկվող՝ ֆիքսված հեռախոսակապի ու ինտերնետ ծառայության համար վճարումների ընդունումը:

    Տեղեկացնենք, որ Beeline կապի ծառայությունների դիմաց վճարել կարելի է միայն Beeline գրասենյակների Telcell մասնաճյուղերում: Մեր մյուս մասնաճյուղերի, ՀՀ եւ ԼՂՀ տարածքում տեղակայված տերմինալների, սուպերմարկետներում սպասարկման կետերի, ինչպես նաեւ մեր գործընկեր բանկերի՝ Telcell պրոցեսինգային կենտրոնին միացված ինքնասպասարկման գոտիների միջոցով վճարումներ կատարել ներկա պահին հնարավոր չէ»,- ասված է հաղորդագրությունում:
     
    Ներկայում Beeline-ի հետ բանակցությունները շարունակվում են, եւ «Թել-Սել»-ը հույս է հայտնում շուտափույթ հարթել խնդիրը:

    ««Թել-Սել» ընկերությունը միշտ բաց է երկխոսության, փոխզիջումների եւ համագործակցության համար: Էլեկտրոնային վճարումների շուկայում շուրջ 10-ամյա գործունեության ընթացքում «Թել-Սել»-ը հավատարիմ է հաճախորդների սպասարկման մատչելիություն ապահովելու եւ վճարումների գործընթացը հարմարավետ դարձնելու իր քաղաքականությանը»,- նշել են ընկերությունում:

    Հիշեցնենք, որ նախօրեին ընկերությունը հայտարարել էր Թել-Սել, Իդրամ, Իզի Փեյ ընկերությունների տերմինալների միջոցով վճարումների ընդունման դադարեցման մասին՝ պայմանավորված «անհավասար միջնորդավճարային քաղաքականությամբ»: