Երեւանը մինչեւ տարեվերջ տեղ կգտնի «Յանդեքս.Պանորամա»-ում

Երեւանը մինչեւ տարեվերջ կհայտնվի «Յանդեքս.Պանորամա»-ում: Նկարահանման աշխատանքները տեւել են 6 օր, եւ դրանց ավարտին Itel.am-ը զրուցել է նկարահանող խմբի հետ:

«Յանդեքս.Քարտեզներ»-ի քարտեզագրման ծառայության ղեկավարի տեղակալ Նիկոլայ Կալաշնիկովը նշել է, որ Երեւանում պանորամային տեսքով նկարահանվել է շուրջ 500 կմ տարածք:

««Յանդեքս.Պանորամա»-ն նկարահանել է Երեւանի համայնապատկերը՝ բոլոր գլխավոր փողոցներով: Սա հնարավորություն կտա վիրտուալ շրջել Երեւանով: Սկզբում պլանավորվում էր նկարահանել շուրջ 440 կմ տարածք, սակայն նկարահանումների ժամանակ հասկացանք, որ դա բավարար չէ: Մենք նկարահանել ենք ոչ միայն երթեւեկելի, այլեւ հետիոտնային փողոցները: Ընդգրկված են նաեւ այնպիսի հայտնի զբոսաշրջային վայրեր, ինչպիսիք են Գառնին, Գեղարդը, Էրեբունի ամրոցը եւ այլն»,- պատմել է Նիկոլայ Կալաշնիկովը:

Նրա խոսքով՝ Երեւանի պանորամային քարտեզը «Յանդեքս.Քարտեզներ»-ում կհայտնվի նոյեմբեր-դեկտեմբերին:

«Նկարահանումը բավական ժամանակատար գործընթաց է: «Պանորամամոբիլ»-ը մեկ կադր ստանալու համար միաժամանակ 4 լուսանկար է անում՝ ինչը հնարավորություն է տալիս նայել վերեւ, ներքեւ, աջ ու ձախ: Կենտրոնում նկարահանումներն արվում են յուրաքանչյուր 20 մետրի վրա, իսկ կենտրոնից դուրս՝ 50 մետրը մեկ: Այդպիսով ստացվում է պանորամաների բավական մեծ թիվ, 500 կմ նկարելու դեպքում՝ շուրջ 40 հազ. պանորամային լուսանկար՝ յուրաքանչյուրը կազմված 4 լուսանկարից: Արդյունքում ստացվում է 160 հազ. լուսանկար՝ Երեւանը եւ նրա տեսարժան վայրերը հավուր պատշաճի ներկայացնելու համար»,- նշել է Նիկոլայ Կալաշնիկովը:

photo © Յանդեքս

photo © Յանդեքս

««Յանդեքս.Պանորամա»-ն մի քանի տարի ավելի շուտ է սկսել գործել, քան «Յանդեքս.Տաքսի»-ն: Ու հիմնականում ստացվում էր այնպես, որ «Յանդեքս.Տաքսի»-ն էր գալիս այն քաղաքներ, որտեղ արդեն իսկ գործում էր «Յանդեքս.Պանորամա»-ն: Երեւանի դեպքում հակառակն է՝ այստեղ առաջինը եկել է «Յանդեքս.Տաքսի»-ն, ապա՝ «Յանդեքս. Պանորամա»-ն: Բացի այդ, Երեւանը նախկինում ամբողջովին իրեն ծածկող պանորամային քարտեզ չի ունեցել, հետեւաբար՝ «Յանդեքս.Պանորամա»-ն առաջինն է լինելու: Նկարահանումներն իրականացվել են «Յանդեքս.Տաքսի»-ի հետ համատեղ: Դա եղել է նրանց գաղափարը, քանի որ կարեւորում են ճշգրիտ քարտեզի առկայությունը, որից կօգտվեն ինչպես տաքսիստները, այնպես էլ հաճախորդները»,- հավելել է Նիկոլայ Կալաշնիկովը:

photo © Յանդեքս

Նրա խոսքով՝ իրենք ջանք չեն խնայել, որպեսզի երեւանցիներին արդյունքը դուր գա:

Փողոցների պանորամային նկարահանումներով զբաղվող Нек4 ընկերության ծրագրերի ղեկավար Օլգա Բոլոտովան իր հերթին պատմել է, որ նկարահանումների ընթացքում խոչընդոտների հանդիպելու մտավախություն են ունեցել:

«Մենք կարծում էինք, որ Երեւանի փողոցներում մեզ կկանգնեցնեն ու կհարցնեն, թե ինչ ենք անում, եւ որոշ դեպքերում կարգելեն նկարահանել: Նման իրադրություններ այլ քաղաքներում նախկինում եղել են, եւ դրանց պատճառով սովորաբար շատ ժամանակ է ծախսվում»,- նշել է նա:

Օլգա Բոլոտովան ընդգծել է, որ Երեւանի ճանապարհները բավական լավն են, ինչն արագացրել է նկարահանումների գործընթացը: