09:55 | 13.11.15 | Հարցազրույցներ | exclusive 10224

Իսրայելցի ձեռնարկատեր. Հայաստանը տեխնո կենտրոն դառնալու ճանապարհին է

Այսօր Դիլիջանում մեկնարկում է «Հայաստան 20.18-2018թ.՝ Հայաստանը 20 ամենանորարար երկրների շարքում» խորագրով Բիզնես ինովացիոն երկօրյա ֆորումը:

Ֆորումի կազմակերպիչը Ինֆորմացիոն տեխնոլոգիաների ձեռնարկությունների միությունն է, գլխավոր հովանավորը՝ BetConstruct ընկերությունը:

Հիմնական խոսնակների թվում է Իսրայելի առաջատար ձեռնարկատերերից մեկը՝ Ելենա Դոնեթսը: Վերջինս նաեւ Իսրայելի StarTau համալսարանի ձեռներեցության կենտրոնի գործադիր տնօրենն է:

Նա կորպորատիվ ընկերություններին խորհրդատվություն է տրամադրում ինովացիոն կենտրոնների ստեղծման եւ աքսելերացիոն ծրագրերի ներդրման վերաբերյալ: 

Մինչ ֆորումի մեկնարկը Itel.am-ը զրուցել է Ելենա Դոնեթսի հետ:

- Տիկին Դոնեթս, մինչ Երեւան ժամանելը ի՞նչ տեղեկություններ ունեիք Հայաստանի ստարտափ էկոհամակարգի մասին: Ո՞ր հայկական ստարտափները կառանձնացնեիք:

- Հայաստանում գործում է «Մայքրոսոֆթի» կենտրոնը, որն աջակցություն է տրամադրում ստարտափներին եւ ձեռնարկատերերին: Intel-ը եւս այստեղ զարգացման կենտրոն ունի, ինչը նպաստում է էկոհամակարգի զարգացմանը եւ ուղղորդում դեպի նորարարություն:

Հայտնի ստարտափներից կարող եմ նշել իհարկե Reddit-ը: Վերջինս ապացույցն է այն բանի, որ ճիշտ մոտեցման դեպքում հիանալի բաներ կարող են սկսվել Հայաստանից (Reddit-ը ամերիկյան հարթակ է, որի համահիմնադիրը Ալեքսիս Օհանյանն է – խմբ.):

-Լինելով Իսրայելի ամենահայտնի ձեռնարկատերերից մեկը՝ հայկական ստարտափների կողմից երբեւէ հետաքրքրություն նկատե՞լ եք իսրայելական շուկայի նկատմամբ: 

-Կարծում եմ, դեռ նոր պետք է լսեմ Հայաստանից Իսրայելի նկատմամբ հետաքրքրության մասին, սակայն տարածաշրջանում շատ երկրներ, ինչպես Վրաստանը եւ Ադրբեջանը, սկսում են հետաքրքրվել իսրայելական նորարարություններով, նույնը կարող է անել նաեւ Հայաստանը:

- Նշանակում է, նաեւ խորհուրդ տալիս եք հայերին մտնել իսրայելական շուկա: Այդպե՞ս է:

-Այո: Իսրայելը շատ գիտելիք ունի հատկապես այն ոլորտներում, որտեղ էլ ոչ ոք չունի՝ գյուղատնտեսություն, կիբեր անվտանգություն: Մենք սիրում ենք արտահանել մեր գիտելիքը: Իսրայելցիները կարող են մենթորներ, բիզնես գործընկերներ լինել եւ որոշ դեպքերում՝ նույնիսկ ներդրողներ:  

- Ձեր կարծիքով, Հայաստանը ներուժ ունի՞ դառնալու տարածաշրջանային տեխնո կենտրոն, եւ ի՞նչ է պետք դրա համար:

- Այո, ունի: Արդեն իսկ երկու խոշոր անուն՝ Intel-ը եւ Microsoft-ը գործում են շուկայում: Հայաստանը տեխնո կենտրոն դառնալու ճանապարհին է: Այն, ինչ պետք է անել, ներքեւից վերեւ գնալն է՝ ստեղծելով որքան հնարավոր է շատ հնարավորություններ՝երիտասարդների եւ ուսանողների շրջանում ձեռնարկատիրությունը խրախուսելու նպատակով:

- Ձեր երեք գլխավոր խորհուրդները հայկական ստարտափներին:

- Ամենասկզբից գլոբալ մտածեք՝ ուղղորդելով ձեր պրոդուկտը համաշխարհային շուկաներ: Մի վախեցեք ձախողումից՝ դա ավելի մեծ հաջողություններ կբերի: Եվ վերջում՝ խորհուրդներ եւ օգնություն ստացեք բոլոր հնարավոր աղբյուրներից:

Ելենա Դոնեթսի հետ զրուցել է Նարինե Դանեղյանը