Gmail փոստային ծառայությունում այսուհետ կարելի է հետ կանչել (Undo) ուղարկած էլեկտրոնային նամակը:
Այս մասին Google-ը հայտարարել է իր պաշտոնական բլոգում:
Շուրջ վեց տարի տեւած թեստավորումից հետո գործառույթն այսուհետ հասանելի է Gmail-ի վեբ տարբերակի բոլոր օգտատերերին:
Այն պահին, երբ օգտատերը սեղմում է «Ուղարկել» (Send) կոճակը, էկրանի վերին մասում հայտնվում է դեղին ուղղանկյուն: Այդպիսով Gmail-ն առաջարկում է ցանկության դեպքում հետ կանչել այն: Ուղարկած նամակը կարելի է հետ կանչել 5, 10 կամ 20 վայրկյանի ընթացքում՝ կարգավորումներում նախապես ընտրելով ժամանակահատվածը:
Չուղարկված նամակները պահպանվում են «Սեւագիր» (Draft) բաժնում:
Ինչ վերաբերում է մոբայլ սարքերին, ապա գործառույթից օգտվելու համար պետք է ներբեռնել Inbox հավելվածը:
Ի դեպ, 2015թ. մայիսի տվյալներով, Gmail-ի օգտատերերի 75%-ն էլփոստից օգտվել է մոբայլ սարքավորման միջոցով: Ամբողջ աշխարհում ծառայության օգտատերերի թիվը հասնում է 900 մլն-ի:
