ԱրմԹաբ-ի արտադրողը աշխատանքի է հրավիրում

«Թեքնոլոջի ընդ Սայնս Դայնամիքս» (TSD) ընկերությունը, որը հայկական արտադրության ԱրմԹաբ դյուրակիր համակարգիչների եւ Արմֆոն հեռախոսների նախաձեռնողն ու արտադրողն է, հայաստանյան բուհերի ինժեներական կրթությամբ ուսանողներին եւ շրջանավարտներին առաջարկում է աշխատանք ընկերության արտադրամասում:

Ներկայացվող աշխատատեղերի թվում են հետեւյալ թափուր հաստիքները՝

-    բաղկացուցիչ մասերի թեստավորման ինժեներ;
-    արտադրանքի թեստավորման ինժեներ;
-    սարքերի օպերատոր;
-    տեխնիկական սպասարկման մասնագետ;
-    շահագործման գծով պատասխանատու ինժեներ;
-    արտադրության աշխատակից;
-    ցանցային ադմինիստրատոր;
-    արտադրության ղեկավարի օգնական;
-    դիզայներ եւ այլն:

Ընկերությունը ներկայումս իրականացնում է արտադրական բուն գործընթացի կազմակերպման լայնածավալ աշխատանքներ` արտադրամասի վերանորոգում եւ վերազինում, ինչպես նաեւ համապատասխան ենթակառուցվածքների մշակում: 

Ընկերությունը համապատասխան թափուր աշխատատեղերի ցանկը ներկայացրել է նաեւ Երեւանում գործող 6 բուհերին՝ Երեւանի պետական համալսարան, Հայաստանի պետական ճարտարագիտական համալսարան, Եվրոպական տարածաշրջանային ակադեմիա, Հայ-Ռուսական (Սլավոնական) համալսարան, Հայաստանում Ֆրանսիական բարձրագույն ինժեներական ինստիտուտ, Հայաստանի ամերիկյան համալսարան:

2013 թ.-ին «Թեքնոլոջի ընդ Սայնս Դայնամիքս»-ը Երեւանի ազատ տնտեսական գոտում նախաձեռնել է դյուրակիր համակարգիչների, հեռախոսների եւ տեխնոլոգիական այլ սարքավորումների հավաքման, թեստավորման եւ որակի վերահսկման կազմակերպման աշխատանքներ՝ նպատակ ունենալով հայաստանյան, տարածաշրջանային եւ միջազգային շուկաներում ներկայացնել հայկական ապրանքանիշը:

Դյուրակիր համակարգիչների առաջին խմբաքանակը նախատեսվում է արտադրել արդեն այս տարեվերջին:

«Թեքնոլոջի Ընդ Սայնս Դայնամիքս» ՍՊԸ-ի հասցեն է՝ Ազատության 27, Երազ բիզնես կենտրոն, #603, հեռախոս՝ +374 11 20 90 18: