Google-ը օգտատիրոջ կողմից հարցման դեպքում կջնջի նրա անձնական տվյալները

Google-ը Եվրամիության բարձրագույն դատարանի պահանջով գործարկել է ծառայություն, որն օգտատիրոջ հարցման դեպքում որոնման համակարգից կջնջի նրա անձնական տվյալները:

Այս մասին հաղորդում է Lenta.ru-ն՝ հղում կատարելով Google-ի նոր ծառայության էջի վրա:

Այսուհետ եվրոպացի օգտատերերը կարող են պահանջել որոնման համակարգից ջնջել իրենց մասին առկա անձնական ողջ տեղեկատվությունը, իսկ մերժում ստանալու դեպքում` դիմել դատարան:

Նշվում է, որ մայիսի 30-ին Google-ը գործարկել է հատուկ օնլայն ձեւաթուղթ, որում անհրաժեշտ է նշել անունը, երկիրը, էլփոստի  հասցեն, այն տեղեկատվության հղումը, որը ցանկանում են ջնջել` նշելով նաեւ պատճառը: Այս ամենին պետք է կցել անձնագրի կամ նույնականացման քարտի պատճեն:

Տեղեկացնենք, որ Google-ը բացասաբար է վերաբերվում դատարանի կայացրած որոշմանը եւ մայիսի 13-ին ստեղծել է ինտերնետ փորձագետներից կազմված կոմիտե` համատեղ ուժերով հետագա մարտավարություն մշակելու նպատակով:

«Google-ը կփորձի հավասարակշռություն պահպանել անձնական  տեղեկատվության արգելափակման եւ այնպիսի հղումների պահպանման միջեւ, որոնք կարող են հասարակական հետաքրքրություն ներկայացնել, ինչպես, օրինակ, պաշտոնյաների մասնակցությամբ կոռուպցիայի մասին հոդվածները», - հայտարարել է ընկերության գլխավոր տնօրեն Լարի Փեյջը՝ հավելելով, որ որոշումը կարող է բացասաբար ազդել ոչ մեծ ինտերնետ ստարտափերի վրա եւ հանդիսանում է օնլայն հաղորդակցության խոշոր սահմանափակում:  

Google-ի գլխավոր իրավաբան Դեյվիդ Դրամոնդն էլ հայտարարել է, որ դատական լսումները շատ հեռուն են գնացել եւ դատարանը հաշվի չի առել իր որոշման ազդեցությունը խոսքի ազատության վրա:

Կա մտավախություն, որ Եվրոպական դատարանի որոշումը կարող է դժվարություններ ստեղծել ամերիկյան ինտերնետ ընկերությունների համար, որոնք ավտոմատացված համակարգով մշակում են մեծ քանակությամբ տեղեկատվություն:

Բացի այդ, անձնական տվյալները ջնջելու պահանջով մեծ քանակությամբ հարցումները զգալիորեն կմեծացնեն ընկերության ծախսերը:

Հիշեցնենք, որ դատարանը նման որոշում է կայացրել անձնական կյանքի գաղտնիության իրավունքի համար պայքարողների ակցիաների արդյունքում:

Ակցիաներ իրականացնող այդ խմբերը փորձում են ինտերնետ օգտագործողների համար «մոռացվելու իրավունք» ձեռք բերել: Սա նշանակում է ունենալ հնարավորություն ջնջելու ինտերնետում քո մասին առկա ողջ տեղեկատվությունը, որը կարող է լինել հնացած, սխալ կամ տարածման համար ոչ ցանկալի: