ՀՀ կառավարությունն այսօր հավանություն է տվել «Տեղեկատվական տեխնոլոգիաների ոլորտի պետական աջակցության մասին» օրինագծին:
Ինչպես հաղորդում է Մեդիամաքս-ը, ՀՀ էկոնոմիկայի նախարար Վահրամ Ավանեսյանն ասել է, որ այս օրինագիծը վերաբերում է ՏՏ ոլորտի սկսնակ ձեռնարկություններին, որոնք ունեն ոչ ավել, քան 15 աշխատող:
Startup-ները պետական աջակցության շրջանակներում կազատվեն շահութահարկից, իսկ եկամտահարկի ֆիքսված դրույքաչափը կկազմի 10 տոկոս:
Բացի այս արտոնություններից, նախատեսվում է, որ ՏՏ ոլորտի սկսնակ ձեռնարկությունները դրամաշնորհներ եւ տեխնիկական աջակցություն կստանան:
Նախարարը տեղեկացրել է, որ ընկերություններին տրամադրված արտոնությունները գործելու են 3 տարի, իսկ օրինագիծը՝ մինչեւ 2020 թվականը:
«Ակնկալում ենք, որ այս նախաձեռնությունը հնարավորություն կտա առաջիկա 3-5 տարիների ընթացքում տարեկան շուրջ 40-60 սկսնակ ձեռնարկություններ ի հայտ բերել: Ընկերությունների հիմնական նպատակն է լինելու ինտելեկտուալ ապրանքների ստեղծումը»,- ասել է Վահրամ Ավանեսյանը:
ՀՀ վարչապետ Տիգրան Սարգսյանն ասել է, որ օրենքի նախագիծը քննարկվել եւ հավանության է արժանացել ՀՀ նախագահի կողմից:
«Այս որոշումն ունի քաղաքական բովանդակություն: Այսօր ՏՏ ոլորտը հասել է զարգացվածության այնպիսի աստիճանի, որ անհրաժեշտ են որակական նոր փոփոխություններ, որպեսզի ՏՏ ոլորտի միջազգային քարտեզում Հայաստանը գրավի իր հատուկ տեղը»,- ասել է վարչապետը:
«Տեղեկատվական տեխնոլոգիաների ոլորտի պետական աջակցության մասին» օրենքի նախագիծը կառավարությունը համարել է անհետաձգելի:
