Երեւան: Մեդիամաքս: Սեպտեմբերի 28-29-ին Երեւանում՝ ԹՈՒՄՈ ստեղծարար տեխնոլոգիաների կենտրոնում, տեղի կունենա իր տեսակի մեջ առաջին անգամ անցկացվող դեվելոփերների կոնֆերանսը՝ DevFest Armenia 2013-ը:
Միջոցառմանը կներկայացվեն ինչպես Google-ի, այնպես էլ այլ տեխնոլոգիաների մասին զեկույցներ եւ ներկայացումներ:
Միջոցառման ամբողջական օրակարգը հասանելի է այստեղ:
Երկօրյա միջոցառման կոնֆերանսի եւ DevBarcamp-ի ընթացքում հայաստանյան առաջատար ՏՏ ընկերությունների ներկայացուցիչները կներկայացնեն իրենց տեխնոլոգիական նորագույն լուծումները:
Միջոցառմանը ներկա կլինի Google ընկերության հատուկ բանագնացը՝ Իգոր Մահանյոկը, ով կոնֆերանսում իր զեկույցի ժամանակ կներկայացնի Google Glass-ը:
Հատուկ հյուրերի թվում են նաեւ Google Developer Group Tbilisi-ի մոդերատորները:
Կոնֆերանսին զուգահեռ նախատեսվում է անցկացնել Android հաքաթոն` ArmHackDroid խորագրով, որը սեպտեմբերի 29-ին կշարունակվի 8 ժամ: Հաղթող խմբին կհանձնվի հատուկ մրցանակ՝ Asus Nexus 7 գրասալիկ:
Միջոցառման գործընկեր Bet Construct ընկերությունը նախապատրաստել է 1000 ԱՄՆ դոլար դրամական մրցանակ այն թիմի համար, ով կկարողանա հաքաթոնի ընթացքում ստեղծել իրական ժամանակում տեսանյութերի եւ թվիթների հոսք ապահովող Անդրոիդ հավելված:
Հաղթող թիմը 2013թ. հոկտեմբերի 17-ին GDG Armenia խմբի հետ կմեկնի Թբիլիսի՝ մասնակցելու DevFest Tbilisi 2013 միջոցառմանը:
Միջոցառումը կազմակերպվել է Google Developer Group Armenia-ի կողմից՝ Google ընկերության օժանդակությամբ: Միջոցառմանն աջակցել են նաեւ ԹՈՒՄՈ ստեղծարար տեխնոլոգիաների կենտրոնը, Bet Construct եւ LinkGard ընկերությունները:
Միջոցառման մասնակցության գրանցումն արդեն փակվել է, սակայն ցանկացողները կարող են ներկա գտնվել՝ սեպտեմբերի 28-29-ին այցելելով ԹՈՒՄՈ ստեղծարար տեխնոլոգիաների կենտրոն: Գրանցված եւ չգրանցված մասնակիցները հնարավորություն կունենան մասնակցել կոնֆերանսին եւ քննարկումներին, զրուցել հատուկ բանագնացների հետ, ուսումնասիրել Google Glass-ը:
