«ՎիվաՍել-ՄՏՍ»-ը հաճախականություններ է ստացել 4G ցանցի գործարկման համար

Երեւան/Մեդիամաքս/. ՀՀ Հանրային ծառայությունները կարգավորող հանձնաժողովն /ՀԾԿՀ/ այսօր բավարարել է «ՎիվաՍել-ՄՏՍ» ընկերության հայտը ռադիոհաճախականությունների տրամադրման վերաբերյալ` LTE (Long Term Evolution) տեխնոլոգիայի հիման վրա չորրորդ սերնդի ցանց (4G) գործարկելու նպատակով:

«ՎիվաՍել-ՄՏՍ»-ի գլխավոր տնօրեն Ռալֆ Յիրիկյանն ասել է, որ «այսօր շատ կարեւոր օր է մեր ընկերության համար»:

««ՎիվաՍել-ՄՏՍ»-ը կդառնա առաջատարը չորրորդ սերնդի ցանցի կառուցման ոլորտում: Մենք շուտով ցանցը շահագործման կհանձնենք. ընկերությունը վաղուց է աշխատում ցանցի կառուցման ուղղությամբ, ու մեզ մնում էր միայն ստանալ հաճախականությունների օգտագործման թույլտվություն»,- ասել է Ռալֆ Յիրիկյանը:

Նրա խոսքերով, ընկերությունը կսկսի 4G ցանցի ծառայություններ մատուցել Երեւանում, ապա նաեւ մարզերում` կախված բնակչության խտության աստիճանից: Ռալֆ Յիրիկյանը նշել է նաեւ, որ 4G ցանցը զարգանալու է երրորդ սերնդի ցանցի (3G) ծառայությունների հետ զուգահեռ: 

Ընկերության ղեկավարը հայտնել է, որ 3G ցանցը հասանելի է ՀՀ ավելի քան 650 բնակավայրերում:

«4G ցանցի գործարկումից հետո մենք կկարողանանք տասնյակ անգամ մեծացնել ցանցի արագության հնարավորությունները»,- ընդգծել է Ռալֆ Յիրիկյանը: