VivaCell-MTS-ը եւ FPWC-ն Վանաձորում գործարկել են «Կանաչ դպրոց» ծրագիրը

Երեւան/Մեդիամաքս/. VivaCell-MTS բջջային օպերատորը եւ Վայրի բնության եւ մշակութային արժեքների պահպանման  հիմնադրամը (FPWC) Վանաձորում գործարկել են «Կանաչ դպրոց» ծրագիրը:

Ինչպես Մեդիամաքս-ին հայտնել են VivaCell-MTS-ի մամուլի ծառայությունում, ծրագիրը մեկնարկել է «Կանաչ սերունդ 2010» արշավի շրջանակներում:

Մինչեւ հունիս Վանաձորի թիվ 10 միջնակարգ դպրոցի աշակերտները  պլաստիկ շշեր եւ օգտագործված թուղթ կհավաքեն տարբեր կառույցներից եւ կհանձնեն «Արեւորդի» էկո-ակումբին, որը թափոնը կհանձնի վերամշակող ընկերության:

FPWC-ն ողջ հասույթը կուղղի դպրոցի հարակից տարածքը կանաչապատելուն, իսկ ամենաակտիվ աշակերտները նվերներ կստանան FPWC-ի եւ VivaCell-MTS-ի կողմից:

FPWC-ն նախատեսում է «Կանաչ Դպրոց» ծրագիր իրականացնել նաեւ ՀՀ այլ մարզերում: