Amazon-ը ներկայացրել է Alexa+ օգնականը

Amazon-ը ներկայացրել է թարմացված Alexa-ն: «Խելացի» օգնականը կարող է կատարել այնպիսի գործեր, ինչպիսիք են մթերք պատվիրել կամ միջոցառման հրավերներ ուղարկել, ինչպես նաեւ զրույց վարել, գրում է The Verge-ը։

Alexa+-ը կարող է նաեւ պատասխանել «Քանի՞ գիրք եմ կարդացել այս տարի» հարցին: Ըստ սարքերի եւ ծառայությունների բաժնի ղեկավար Պանոս Պանայի՝ «նոր Alexa-ն գրեթե ամեն ինչ գիտի» օգտատիրոջ կյանքի մասին՝ ժամանակացույց, խելացի տան տվյալներ, նախապատվություններ, օգտագործվող սարքեր եւ այլն:

Օգնականը կարող է նաեւ «տեսնել» շրջակա միջավայրը՝ օգտագործելով տեսախցիկը, լուսանկարել եւ վերլուծել պատկերները: Օգտատերերը կարող են կառավարել խելացի տնային սարքերը: Շնորհանդեսի ժամանակ Պանայը հարցրել է Alexa-ին, թե որեւէ մեկը դո՞ւրս է եկել զբոսանքի իր շան հետ, իսկ օգնականը պատասխանել է՝ հիմնվելով Ring խելացի տեսախցիկների տվյալների վրա:

Amazon-ը նաեւ ներկայացրել է երեխաների համար նախատեսված տարբերակ, որը կստանան Amazon Kids+ բաժանորդները: Առաջինը Explore with Alexa-ն է, որը կպատասխանի այնպիսի հարցերի, ինչպիսիք են «Կարո՞ղ են բույսերը խոսել միմյանց հետ»: Երկրորդը՝ Stories with Alexa-ն կպատմի պատմություն՝ հիմնվելով տեքստային հուշումի (Prompt) վրա:

Alexa+-ն ամսական արժե 19,99 դոլար՝ անվճար Prime բաժանորդների համար: ԱՄՆ օգտատերերը մուտք կստանան մի քանի շաբաթվա ընթացքում: