15:27 | 21.05.24 | Նորություններ | 11396

Ucom-ի աջակցությամբ կանցկացվի «Արեւորդի» փառատոնը

Մայիսի 24-28-ը Երեւանում Ucom ընկերության աջակցությամբ տեղի կունենա «Արեւորդի» 12-րդ միջազգային բնապահպանական փառատոնը, որն այս տարի կանցկացվի «Կենսաբազմազանություն. բնության զարկերակը» խորագրի ներքո։

Նախորդ փառատոնների ընթացքում ցուցադրվել է 150 երկրից ավելի քան 780 ֆիլմ, այս տարի նախատեսված է 30 ցուցադրություն՝ ընդգծելու բնապահպանական գիտակցության բարձրացման կարեւորությունը եւ կինեմատոգրաֆիայի ուժն այդ հարցում:

«Ucom-ի համար, որպես կանաչ ընկերություն, շրջակա միջավայրի պահպանությունը շատ կարեւոր արժեք է, եւ երիտասարդների տեղեկացվածությունն այս ուղղությամբ մեր բնությունն ու մոլորակը փրկելու լավագույն ճանապարհն են։ Մենք մեծ սիրով աջակցում ենք փառատոնին` վստահ լինելով, որ մասնակցող երիտասարդները մեզ նման կդառնան այս արժեքների կրողներն ու կնպաստեն Հայաստանում կայուն ապագայի կառուցմանը», - նշել է Ucom ընկերության գլխավոր տնօրեն Ռալֆ Յիրիկյանը։

«Արդեն տարիներ շարունակ Արեւորդին մեր հանրությանը հաղորդակից է դարձնում համաշխարհային բնապահպանական մարտահրավերներին, ծառայում՝ որպես կայուն կենսակերպի ջատագով՝ այդ ամենն անելով արվեստի միջոցով։ Փառատոնի գոյության  տարիների փորձը ցույց է տվել, որ սա լավագույն ձեւն է՝ խոսելու բարդ եւ երբեմն անհաղթահարելի թվացող խնդիրների մասին։ Մեր բազմազան միջոցառումների միջոցով փորձելու ենք թիրախավորել դպրոցականներից մինչեւ մեծահասակներ՝ միավորելով բոլորին մեկ ընդհանուր գաղափարի շուրջ՝ լինել ներդաշնակ բնության հետ», - ասել է «Արեւորդի» միջազգային փառատոնի տնօրեն Սոնա Քալանթարյանը։

Ուշադրության կենտրոնում պահելով երիտասարդներին՝ փառատոնի շրջանակում  կազմակերպվել է երիտասարդական անկյան 2 գոտի։

Մայիսի 24-ից 28-ը կլինեն «Փխրուն տարածություն» եւ բնապահպանական պաստառային արվեստի ցուցահանդեսներ։ Նմուշները ներառում են վիդեո ինստալացիաներ, տեղեկատվական էկրաններ, արհեստական բանականության գեներացրած պատկերներ, վերամշակված նյութերից պատրաստած քանդակներ, պաստառներ եւ այլն։ Մայիսի 26-ին փառատոնի մասնակիցները, պատանիներն ու երիտասարդները հնարավորություն կունենան մասնակցել «Կենդանիների դիմակահանդես-շքերթին»։

«Արեւորդի» 12-րդ միջազգային բնապահպանական փառատոնի իրականացմանը աջակցել են նաեւ Երեւանի քաղաքապետարանը, ԱՄՆ անտառային ծառայությունը, Վայրի բնության եւ մշակութային արժեքների պահպանման հիմնադրամը եւ Բրիտանական խորհրդի հայաստանյան գրասենյակը։