WWDC 2023. Vision Pro, iOS 17 եւ այն ամենն, ինչ Apple-ը ներկայացրել է

Հունիսի 5-ին WWDC կոնֆերանսի ընթացքում Apple-ը ներկայացրել է մի շարք նորույթներ, որոնցից ամենացնցողը Vision Pro վիրտուալ եւ ընդլայնված իրականության ակնոցն է։

Ներկայացնում ենք ամենահետաքրքիր եւ կարեւորը WWDC-ից։

Apple Vision Pro

Այն բավականին կոմպակտ ակնոց է սեփական visionOS օպերացիոն համակարգով:

«Սա նոր տեսակի համակարգիչ է, որը լրացնում է իրականությունը՝ անխափան կերպով միախառնելով թվային աշխարհն իրականի հետ», - ասել է Apple-ը:

Սարքը նախատեսված է աշխատանքի եւ ժամանցի համար։ Այն նման է դահուկների ակնոցի եւ թույլ է տալիս նկարը «վերածել» իրականության՝ ցուցադրելով տարբեր միջերեսներ։

Այս ակնոցը դնելիս օգտատերը տեսնում է իրական աշխարհը, որի վերեւում կցուցադրվեն հավելվածների պատուհանները։ Նրանցից յուրաքանչյուրի ինտերֆեյսը կարող է մասշտաբավորվել՝ կարգավորելով չափերը եւ տեղադրված դիրքերը:

Vision Pro-ի միջոցով կարող եք դիտել տեսանյութեր եւ լուսանկարներ, ճամփորդել Safari-ում, զրուցել FaceTime-ով, խաղեր խաղալ, գրառումներ կատարել եւ ստեղծագործել: Ըստ մշակողների՝ այս ամենն ընդլայնված իրականության մեջ բոլորովին նոր փորձ է եւ այժմ սովորական սցենարներն ընդմիշտ կփոխվեն՝ դառնալով եռաչափ։

Mac-ն ակնոցին անլար միացնելու հնարավորություն կա՝ ձեր սովորական աշխատասեղանը վիրտուալ ռեժիմում տեսնելու համար:

Սարքը կառավարվում է Siri-ի միջոցով՝ բացառապես աչքերով, ձեռքերով եւ ձայնով, առանց մկնիկի կամ խաղային վահանակի: Ցանկության դեպքում կարող եք միացնել ստեղնաշարը: Սենսորների եւ տեսախցիկների հավաքածուն թույլ է տալիս ճշգրիտ կարդալ բոլոր ժեստերը: Վերեւում կա նաեւ մենյուների, ինտերֆեյսերի եւ նկարների թափանցիկությունը կառավարող անիվ:

Բոլոր ծանոթ հավելվածները կարող են օգտագործվել բառացիորեն օդում: Այս փոխազդեցությունը հատկապես տպավորիչ տեսք կունենա տեսազանգերի, 3D-ով ֆիլմեր դիտելու եւ խաղերի համար: Գործարկման պահին սարքի համար հասանելի կլինեն տասնյակ AR-գործողություններ եւ ինտերակտիվ խաղեր: Վաճառքի մեկնարկի առաջին օրը հասանելի կլինի նաեւ Disney Plus ծառայությունը:

Շատ նկարներում սարքը թափանցիկ տեսք ունի՝ AR ռեժիմում տեսանելի է օգտատիրոջ դեմքը, բայց իրականում դա ճակատային EyeSight OLED էկրանն է, որը ցույց է տալիս աչքերն իրական ժամանակում։ Դրանք բառացիորեն նկարահանվում եւ ստեղծում են թափանցիկ ապակու Vision Pro-ի էֆեկտը:

VR ռեժիմում աչքերը տեսանելի չեն: Եթե նման սցենարի դեպքում մարդը մոտենա օգտատիրոջը, ապա նա կցուցադրվի վիրտուալ իրականությունում։

Ակնոցի մեկ այլ առանձնահատկությունն այն է, որ տեսախցիկը կարող է 3D պատկեր նկարել տարածական ձայնով: Սա թույլ կտա վերապրել ամենավառ հիշողությունները եռաչափ պատկերով:

Նույն տեսախցիկը օգտագործվում է 3D ավատար ստեղծելու համար, որը կարող է օգտագործվել Teams-ում, Webex-ում եւ Zoom-ում:



Սարքի ինքնավար շահագործումն ապահովվում է արտաքին մարտկոցով, որը կարելի է պահել գրպանում: Այն միացված է լարով մագնիսական միակցիչի միջոցով եւ ապահովում է մոտավորապես երկժամյա աշխատանք:

Նկարի համար պատասխանատու են MicroOLED մատրիցները՝ յուրաքանչյուր աչքի համար 4K լուծաչափով։ Դրանք օժտվել են Zeiss օպտիկայով։ Սարքի սիրտը Apple M2 չիպն է՝ նոր R1 կոպրոցեսորով, որը մշակում է 12 տեսախցիկից, 5 սենսորից եւ 6 միկրոֆոնից ստացված տեղեկատվությունը։

Apple R1-ը նաեւ վերացնում է պատկերի հոսքի հետաձգումը ընդամենը 12 միլիվայրկյանում, ինչն ութ անգամ ավելի արագ է, քան աչքի թարթման արագությունը:

Գործում է նաեւ գաղտնի տեղեկատվության պաշտպանության համակարգ՝ Optic ID: Այն թույլ է տալիս օգտատիրոջը ճանաչել աչքի ծիածանաթաղանթով: Բոլոր տվյալները կոդավորված են եւ երբեք չեն հեռանում սարքից: Apple-ը չի հստակեցրել, թե արդյոք հնարավոր կլինի միացնել մի քանի հաշիվ:

Apple Vision Pro-ի գինը կկազմի 3499 դոլար։ Վաճառքի մեկնարկը՝ հաջորդ տարվա սկզբին։

15 դյույմանոց Macbook Air

Apple-ը ներկայացրել է երկար սպասված 15 դյույմանոց MacBook Air-ը: Արտաքինից սա նոթբուքի հիմնական 13,6 դյույմանոցի ընդլայնված տարբերակն է, բայց որոշ կարեւոր բարելավումներով:

Էկրանը 15,3 դյույմ է, մինչեւ 500 nits պայծառությամբ եւ արդեն ծանոթ կտրվածքով, որը թաքցնում է 1080p տեսախցիկը։ Արտադրողը նոթբուքն անվանել է ամենաբարակը 15 դյույմանոց մոդելներից՝ ընդամենը 11,5 մմ հաստությամբ: Այն կշռում է 1,5 կգ-ից պակաս:

Նման չափերը չեն ազդել ինքնավարության վրա, հակառակը, այն աճել է մինչեւ 18 ժամ: Լիցքավորման համար օգտագործվում է MagSafe միակցիչ: Ծայրերում կան նաեւ երկու Thunderbolt պորտեր (USB-C) եւ աուդիո խցիկ:

Ներսում ութմիջուկանի Apple M2-ն է, որը նոր արտադրանքը դարձրել է մինչեւ 12 անգամ ավելի արագ, քան նախորդ մոդելը՝ Intel չիպով: Սառեցումը պասիվ է: Օպերատիվ հիշողությունը մինչեւ 24 ԳԲ է, իսկ ներքին հիշողությունը՝ մինչեւ 2 ՏԲ:

Հասանելի է նաեւ մատնահետքի սքաներ, Magic Keyboard եւ վերջին 6 բարձրախոսով աուդիո համակարգ: Նոր MacBook Air-ի արժեքը սկսվում է 1299 դոլարից: ԱՄՆ-ի նախնական պատվերները արդեն սկսել են, իսկ առաքումները՝ հաջորդ շաբաթ:



Mac Pro եւ Mac Studio M2 Ultra-ով

Ընկերությունը ներկայացրել է Mac Pro-ն, որն իր հիմքում օգտագործում է բոլորովին նոր՝ M2 Ultra չիպային համակարգ:

24 միջուկային պրոցեսորի, 76 միջուկային GPU չիպի շնորհիվ այն մինչեւ երեք անգամ ավելի արագ է: Ցավոք, օգտատերն ինքը չի կարող թարմացնել RAM-ը, բայց յոթ PCIe սլոտերը եւ ութ Thunderbolt 4 պորտերը խոստանում են ընդլայնում:

Mac Studio-ն նույնպես թարմացումներ է ստացել: Այն գալիս է M2 Max եւ M2 Ultra կոնֆիգուրացիաներով՝ ավելի բարձր թողունակությամբ HDMI միակցիչով, որն ապահովում է մինչեւ 8K լուծաչափ եւ 240 Հց թարմացման արագություն:

Թարմացված Mac Studio-ի արժեքը սկսվում է 1999 դոլարից, մինչդեռ Mac Pro-ն՝ 6599 դոլարից:

iOS 17

iOS 17-ը սմարթֆոնների համակարգի հաջորդ խոշոր թարմացումն է, որը հասանելի կլինի օգտատերերին սեպտեմբերին iPhone 15-ի շնորհանդեսին զուգահեռ: Ահա թե ինչ փոփոխություններ է ավելացնում համակարգի նոր տարբերակը:

Օգտատերերը կկարողանան ավելի անհատականացված կոնտակտային քարտեր պատրաստել՝ լուսանկարով եւ անունով էկրան, որը կցուցադրվի զանգերի ժամանակ:

Այժմ, երբ ինքնապատասխանիչով հաղորդագրություն եք թողնում, iPhone-ի էկրանին կհայտնվի իրական ժամանակի տեքստի տառադարձում: Սա կօգնի հասկանալ, թե որքան հրատապ է զանգահարողի գործը եւ արդյոք պետք է անմիջապես վերցնել հեռախոսը, թե՞ կարելի է սպասել մինչեւ հարմար պահը:

Երբ օգտատերը կիսում է աշխարհագրական դիրքը, նա հնարավորություն կունենա սահմանելու իր նպատակակետը: Այսպիսով, զրուցակիցը ծանուցում կստանա եւ կիմանա, որ դուք ժամանել եք: Սա օգտակար է, երբ դուք պայմանավորվել եք կամ անհանգստանում եք, որ ընկերը կամ ընտանիքի անդամն ուշ է տուն գալիս:

Դիպչելով սմարթֆոններին՝ այժմ AirDrop-ը կարելի է ակտիվացնել՝ կոնտակտ ընտրելու եւ փոխանցումը հաստատելու փոխարեն: Գործառույթը կաշխատի նաեւ նոր NameDrop-ի հետ, որը թույլ է տալիս արագ փոխանցել ձեր հեռախոսահամարը, անունը եւ պրոֆիլի լուսանկարը:

Բացի այդ, iOS 17-ը թույլ կտա ձեզ մեծ ֆայլեր փոխանցել ցանցով, երբ ժամանակ չկա մնալու Bluetooth տիրույթում, մինչեւ փոխանցման ավարտը:

Կավելանա նոր Journal հավելված՝ հիշողության ձայնագրման համար, որը թեմաներ ընտրելու համար կօգտագործի խելացի առաջարկներ: Սմարթֆոնը կառաջարկի գրել մի երգի մասին, որը հաճախ եք լսում, կամ այն վայրի մասին, որը վերջերս այցելել եք:

Նոր StandBy ռեժիմը թույլ կտա օգտագործել iPhone-ը որպես խելացի էկրան: Այն կարելի է միացնել, երբ սմարթֆոնը տեղադրվում է լանդշաֆտային կողմնորոշմամբ եւ չի օգտագործվում: Այսպիսով, այն կարող է ցուցադրել ընտրված տեղեկատվությունը` օրացույց, զարթուցիչ, ընտրված վիդջեթներ կամ սիրելի լուսանկար:

iPhone-ի, iPad-ի, Mac-ի, HomePod-ի եւ այլ սարքերի վրա ձայնային օգնականին ակտիվացնել կարելի է պարզապես անունով՝ Siri: «Բարեւ» ասելն այլեւս անհրաժեշտ չէ: Եվ հաջորդական հարցումները կարող են սահմանվել՝ առանց անընդհատ ակտիվացնելու:

iOS 17-ը համատեղելի կլինի iPhone XS-ի եւ ավելի նոր տարբերակների հետ: Սա նշանակում է, որ ավարտվում է iPhone 8-ի, 8 Plus-ի եւ X-ի աջակցումը: Բետա տարբերակը հասանելի է:

Ներկայացվել է նաեւ watchOS 10-ը, որը կենտրոնացած է վիջեթների եւ հեծանվավազքի վրա։ Համակարգի 10-րդ տարբերակը կբարելավի լուսանկարների հիման վրա ժամացույցի ինտերֆեյսեր օգտագործելու փորձը։

Բացի այդ, Apple-ը ներկայացրել է macOS Sonoma-ն աշխատասեղանի վիդջեթներով եւ խաղային ռեժիմով։

MacOS Sonoma-ի վիջեթները կարող են տեղադրվել անմիջապես աշխատասեղանի վրա՝ էկրանի ցանկացած կետում: Դրանք ինտերակտիվ են. կարող եք հրաման գործարկել կամ անցնել օրացույցով՝ առանց հիմնական հավելվածը բացելու: Sonoma-ն ունի նաեւ խաղի ռեժիմ, որը բարելավում է կատարողականությունը: