ՀՀ վարչապետ Նիկոլ Փաշինյանն այսօր Հայաստանի՝ 2020-2025թթ. թվայնացման ռազմավարության նախագծի քննարկման ժամանակ ասել է, որ «թվայնացումը հեղափոխական գործընթաց է, եւ աշխատանքը պետք է իրականացնել եւ՛ բովանդակային, եւ՛ տեխնիկական ուղղություններով»:
Վարչապետի դիտարկմամբ, բացի տեխնիկական չափանիշներից, թվայնացման ռազմավարությամբ պետք է քաղաքական հստակ նպատակադրումներ եւ տեսանելի նշաձողեր սահմանվեն, որպեսզի հանրությունը կարողանա պատկերացում ունենալ նպատակների եւ արդյունքների մասին:
Բարձր տեխնոլոգիական արդյունաբերության նախարարի տեղակալ Ստեփան Ծատուրյանն էլ նշել է, որ էլեկտրոնային կառավարման եւ թվային տեխնոլոգիաների զարգացմամբ Հայաստանն առաջատար դիրքեր է զբաղեցնում:
Նրա խոսքով՝ Թվայնացման ռազմավարությամբ նախատեսվում է իրականացնել պետության, տնտեսության եւ հասարակության թվային փոխակերպում:
Արդյունքում ակնկալվում է՝ հանրային ծառայությունների մատուցման բարձր որակի ապահովում, պետական կառավարման արդյունավետության աճ, ինստիտուցիոնալ թվայնացում, ենթակառուցվածքների զարգացում, տվյալահեն որոշումների կայացում, թվային հմտություններով աշխատուժի զարգացում:
Նախատեսվում է ռազմավարությունն իրականացնել 2 փուլով՝ 2020-2021 թթ. եւ 2022-2025 թթ.:
