Փոխնախարար. Ստեղծված իրավիճակում ՏՀՏ ոլորտի մեծ թվով ընկերություններ խնդիրների են բախվում

Կորոնավիրուսի համավարակի արդյունքում ստեղծված իրավիճակի պատճառով ՏՀՏ ոլորտի մեծ թվով հայաստանյան ընկերություններ, որոնք աշխատում են ամերիկյան շուկաների հետ, խնդիրների են բախվում:

Այս մասին ասել է ՀՀ բարձր տեխնոլոգիական արդյունաբերության նախարարի տեղակալ Ստեփան Ծատուրյանը՝ Տնտեսական լրագրողների ակումբի առցանց հանդիպման ընթացքում:

«Արեւմտյան շուկաներում ճգնաժամ է: Նախարարության հարցմանը մասնակցած հայաաստանյան աութսորսինգ ընկերությունների շուրջ 60 տոկոսը խնդիրներ ունի, քանի որ պատվիրատուները այդ շուկաներից են: 40-45 տոկոսի մոտ էլ առկա է աշխատուժի ոչ լիարժեք օգտագործման խնդիր»,- նշել է նա:

Ստեփան Ծատուրյանը նաեւ խոսել է նախարարության ծրագրերից, մասնավորապես պատմել է տեխնոլոգիական հաբ ստեղծելու գաղափարի մասին, որը թույլ կտա մեկ հարկի տակ հավաքել ստարտափ էկոհամակարգի ներկայացուցիչների եւ խթանել նրանց գործունեությունը:

«Նախարարության ենթակայության տակ է անցել մի քանի կառույց, այդ թվում՝ Մերգելյան ինստիտուտը, որը կարող է դառնալ տեխնոլոգիական հաբ եւ նպաստել տեխնոլոգիական մտքի զարգացմանը»,- նշել է փոխնախարարը:

Ստեփան Ծատուրյանը նաեւ անդրադարձել է մեկ միասնական էլեկտրոնային համակարգ ստեղծելու ծրագրերին, նշելով, որ այդ համակարգում ներկայացված կլինեն բոլոր գերատեսչությունները: