Հայտնի են 2018թ. բիզնեսի կողմից ամենաշատ օգտագործված մեսենջերները

2018թ. բիզնեսի կողմից ամենաշատ օգտագործվող մեսենջերներ են դարձել Skype for Business-ը եւ Microsoft Teams-ը:

Այս մասին է վկայում Spiceworks ընկերության հրապարակած հետազոտությունը:

Եվրոպական եւ ամերիկյան ՏՏ ոլորտի ընկերությունների շրջանում իրականացված հարցմանը մասնակցել է փոքր, միջին եւ խոշոր բիզնեսի շուրջ 900 ներկայացուցիչ՝ արտադրության, բժշկության, կրթության, ֆինանսների որորտից, ինչպես նաեւ ոչ շահույթ հետապնդող կազմակերպություններից:

Հետազոտության համաձայն, այս տարի մեծ թվով ընկերություններ էլ. փոստով հաղորդակցությունը փոխարինել են մեսենջերներով: Նախապատվություն է տրվում այն մեսենջերներին, որոնք ունեն թեմատիկ չատեր, վիդեո կոնֆերանսների եւ ոչ ֆորմալ շփման հնարավորություն:

Հարցման մասնակիցների 21%-ն այս տարի օգտագործել է Microsoft Teams, իսկ 44%-ը՝ կրկին Microsoft-ին պատկանող Skype for Business լուծումը: Երրորդ տեղում Slack-ն է՝ 15%, որին հաջորդում է Google Hangouts-ը՝ 11%:

Մեսենջերներ օգտագործում են փոքր բիզնեսի 58%, միջին բիզնեսի 61% եւ խոշոր բիզնեսի 70%-ը: Նշվում է, որ ինչքան ավելի խոշոր է ընկերությունը, այնքան ավելի հաճախ են վերջինիս աշխատակիցներն օգտագործում մեսենջերներ՝ էլ. փոստի փոխարեն:

Սամվել Ղարագյոզյան