B՛COMM հավելվածը կօգնի լուծել Եղեգնաձորի խնդիրները

Վերջերս գործարկված B՛COMM մոբայլ հավելվածը հնարավորություն է տալիս Եղեգնաձորի երիտասարդներին անանուն կերպով մատնանշել իրենց հուզող խնդիրները եւ առաջարկել լուծումներ:

Հավելվածը հասանելի է Google Play-ում։

Երիտասարդական նախաձեռնության անդամներն են ծրագրավորողներ Վազգեն Բարֆյանը, Զարուհի Հակոբյանը եւ երիտասարդական հետազոտող Հերմինե Կարապետյանը, որոնք Եղեգնաձորում աշխատում են ավագանու անդամ Նարինե Գրիգորյանի եւ ծրագրի համակարգող Լիլիթ Խաչատրյանի հետ։

Itel.am-ի հետ զրույցում Հերմինե Կարապետյանը պատմել է, որ ծրագրի հիմքում ընկած է երիտասարդների միջոցով համայնքային քննարկումներ նախաձեռնելու գաղափարը, երբ համայնքային որոշումների կայացմանը մասնակցելը համատեղվում է B՛COMM սրճարանում ժամանցը կազմակերպելու հետ:  

«Ծրագիրն առանձնահատուկ է նրանով, որ թույլ է տալիս անանուն կերպով նշել Եղեգնաձորի առաջանային խնդիրները, քվեարկության միջոցով որոշել դրանց առաջնայնությունը, ինչպես նաեւ նշել լուծման գաղափարներ եւ  վերահսկել  դրանց վերաբերյալ արձագանքները ավագանու  նիստերից  հետո»,- նշել է Հերմինե Կարապետյանը:  

photo © B՛COMM

Նրա խոսքով՝ ավագանու նիստերից առաջ B՛COMM սրճարանում կկազմակերպվեն բարձրացված խնդիրներից մեկի շուրջ քննարկումներ, որը երիտասարդների ժամանցը կազմակերպելուց բացի, կօգնի բարձրացնել ավագանու գործունեության վերաբերյալ իրազեկվածության մակարդակը՝ կրելով ավագանու գործունեության մասին իրազեկող բնույթ։

«Հավելվածի շարունակական կիրառումը կապահովվի միջոցառումների կազմակերպմամբ, երիտասարդների եւ ավագանու անդամներից առնվազն մեկի հետ համագործակցությամբ՝ ավագանու ինստիտուտի հանդեպ բնակչության վստահությունը բարձրացնելու համար։ Եղեգնաձորում ծրագրի համակարգողին կից ձեւավորվել է երիտասարդների խումբ, որը զբաղվելու է քվեարկության արդյունքների վերաբերյալ հավելյալ տեղեկատվության հավաքագրման աշխատանքներով»,- հավելել է Հերմինե Կարապետյանը:

Ծրագիրն իրականացվում է ՄԱԿ-ի Զարգացման ծրագրի «Դեմո» սոցիալական նորարարության լաբի շրջանակում, որի նպատակն է մշակել լուծումներ քաղաքացիների արդյունավետ մասնակցությունը խթանելու համար։