Y Combinator-ի ծրագրին մասնակցող հայկական ստարտափը կկիսվի փորձով

ԱՄՆ-ում գործող հայկական ստարտափ Collectly-ն, որը կորպորատիվ օգտատերերի համար մեքենայական ուսուցման լուծմամբ (machine learning) պարտքերի կառավարման համակարգ է, մասնակցում է ամերիկյան ամենահայտնի աքսելերատորներից մեկի`Y Combinator-ի ծրագրին:

Այս կապակցությամբ Collectly-ի համահիմնադիր եւ գործադիր տնօրեն Լեւոն Բրուտյանը Itel.am-ի հետ զրույցում տեղեկացրել է, որ ցանկանում է արեւմտյան ՏՏ փորձով կիսվել հայկական ստարտափների հետ՝ Y Combinator-ի շրջանակում գոյություն ունեցող Open Office Hours ձեւաչափի ոճով:
 
Open Office Hours նախաձեռնությունը Y Combinator-ում գործում է 2015-ից: Այն հնարավորություն է զարգացող երկրների ՏՏ համայնքների ներկայացուցիչների համար՝ կապ հաստատել եւ արժեքավոր խորհուրդներ լսել Y Combinator-ի գործընկերներից կամ աքսելերացիոն ծրագրի մասնակիցներից՝ դեմ առ դեմ կամ Skype-ով, կախված աշխարհագրական դիրքից:  

photo © Collectly

Open Office Hours-ին մասնակցությունն անվճար է: Հայաստանյան ստարտափ համայնքի ներկայացուցիչները կարող են գրանցվել այստեղ:

«Ես իսկապես հավատում եմ «համայնքին ետ վերադարձնելու» կոնցեպտին եւ որոշեցի պարզել՝ Հայաստանում տեղակայված ստարտափները ցանկություն կամ կարիք ունե՞ն նման ոճի զրույցներ ունենալ ինձ հետ: Իմ նպատակն աշխարհի լավագույն ձեռներեցների տեսլականը հայկական ստարտափների շրջանում տարածելն է՝ օգնելով նրանց հաղթել այս «պատերազմում»: Որպես հիմնադիր՝ ես հասկանում եմ, թե որքան դժվար է այս ոլորտում առաջ գնալ»,- նշել է Լեւոն Բրուտյանը:

Y Combinator-ի գործընկեր Ադորա Չունգի հետ Itel.am-ի հարցազրույցը կարդացեք այստեղ: