11:10 | 02.09.16 | Հարցազրույցներ | exclusive 20466

Կատրին Մաեր. Վիքիմեդիայի մնացած համայնքները սովորում են Հայաստանի փորձից

Վիքիմեդիա Հիմնադրամի գործադիր տնօրեն Կատրին Մաերն ասել է, որ Վիքիմեդիայի մնացած համայնքները «շատ բան են սովորում Հայաստանի փորձից, որն առաջատար է այս ասպարեզում»:

Այս մասին Կատրին Մաերն ասել է Մեդիամաքսին տված բացառիկ հարցազրույցում:

«Իմացա նաեւ հայկական համայնքի Վիքիակումբների եւ Վիքիճամբարների մասին: Կարծում եմ՝ դրանք բացառիկ են ամբողջ աշխարհում, եւ շատ ոգեւորիչ է, որ Վիքիմեդիայի մնացած համայնքները շատ բան են սովորում Հայաստանի փորձից, որն օրինակ է հանդիսանում շատերի համար: Իհարկե, երկրից երկիր անցնելով` այդ մոդելը մի փոքր կփոխվի, սակայն կարեւոր է, որ գաղափարն ու ոգեշնչումը գալիս է Հայաստանից:

Տպավորիչ է իմանալ, թե ինչպես է դա աշխատում, աճում եւ միջազգայնացվում, ընդլայնվում եւ սկսնակների համար նոր հնարավորություններ ստեղծում: Հիանալի է գիտակցել ներգրավվածության փորձառությունը Վիքիմեդիայում, որը պատանի ուսանողին դարձնում է պատրաստի խմբագիր»,- նշել է նա:

Կատրին Մաերին տպավորել է նաեւ տարածաշրջանային մեկ այլ ծրագիր, որը կոչվում է «Կենտրոնական եւ Արեւելյան Եվրոպայի Գարուն» (CEE Spring):

«Սա այս տարածաշրջանի անհատների միասնական ջանքերի արդյունքն է` խթանելու միմյանց երկրների մասին հոդվածների ստեղծումը: Նորություն չէ, որ Վիքիմեդիայում կարող ես քո երկրի, մշակույթի եւ պատմության վերաբերյալ օտար լեզվով հոդվածներ գտնել: Սակայն պատմական տեսանկյունից այդ հոդվածը կարող է ոչ այնքան լավ ներկայացնել երկրի պատմությունը: Այս տարի Լեհաստանը, Սերբիան, Բելառուսիան, Հայաստանը ջանքեր են գործադրել հարեւան երկրների մասին իրենց լեզվով հասանելի տեղեկատվությունը ընդարձակելու ուղղությամբ: Իմ կարծիքով՝ սա շատ տպավորիչ եւ նորարարական նախագիծ է, բայց այն նաեւ խոսում է միջազգային համագործակցային ոգու մասին, ինչն այնքան բնորոշ է Վիքիմեդիա նախագծերին»,- ընդգծել է նա:

Կատրին Մաերի հարցազրույցն ամբողջությամբ կարող եք ընթերցել այստեղ: