Shadowmatic-ը՝ International Mobile Gaming Awards-ի կրկնակի մրցանակակիր

Shadowmatic-ը հաղթել է Սան Ֆրանցիսկոյում այսօր կայացած International Mobile Gaming Awards 2016-ում՝ մրցանակի արժանանալով միանգամից երկու անվանակարգում:

Այս մասին Itel.am-ին ասել է Triada Studio-ի տեխնիկական տնօրեն Բագրատ Դաբաղյանը: 

Նա տեղեկացրել է, որ Shadowmatic-ը հաղթել է «Լավագույն տեխնիկական նվաճում» եւ «Հանդիսատեսի համակրանք» անվանակարգերում՝ հավելելով, որ «Լավագույն տեխնիկական նվաճում» անվանակարգում առաջադրված էին մի շարք հայտնի խաղեր, այդ թվում Need For Speed: No Limits խաղը: 

2004-ից  անցկացվող մրցանակաբաշխությունն ամեն տարի հավաքում է աշխարհի լավագույն մոբայլ խաղերը եւ դրանք ստեղծողներին: Այս մրցանակաբաշխության ժամանակ են առաջին անգամ ճանաչված դարձել այնպիսի խաղեր, ինչպիսիք են Angry Birds-ը, Infinity Blade-ը, Edge-ը, Candy Crush-ը:

Հիշեցնենք, որ այս տարվա փետրվարին Ամստերդամում կայացած Indie Prize Awards-ի շրջանակում Shadowmatic-ը հաղթող էր ճանաչվել Best Game Art անվանակարգում:

Երեւակայությունը զարգացնող Shadowmatic 3D փազլային խաղը թողարկվել է 2015թ. հունվարին հայկական համակարգչային գրաֆիկայի շուկայի երկարամյա առաջատար Triada Studio ընկերության կողմից: Խաղը հասանելի է 13 լեզուներով, այդ թվում՝ հայերեն:

2015թ. հունիսին Shadowmatic-ն արժանացել էր Apple Design Awards մրցանակին: