Mashtots-ը կսովորեցնի արեւմտահայերեն

Mashtots անվճար կրթական հավելվածը թույլ է տալիս սովորել արեւմտահայերեն՝ զվարճալի եւ ինտերակտիվ խաղերի, վարժությունների միջոցով:

Հավելվածը հասանելի է երեք լեզվով՝ հայերեն, անգլերեն, իսպաներեն:

Mashtots հավելվածի համահիմնադիրներն են Տիգրան Բարսեղյանը, Էրիկ Ղոնյանը եւ Գրիգորի Էյրամջյանը: Ներկայում թիմում աշխատում է 8 մասնագետ:

Itel.am-ի հետ զրույցում ԱՄՆ-ում բնակվող Գրիգորի Էյրամջյանը պատմել է, որ հավելվածը ստեղծվել է շուրջ 6 ամիս առաջ, երբ սկսել են համագործակցել Գալուստ Գյուլբենկյան հիմնադրամի հետ:

«Հիմնադրամը դրամաշնորհ էր սահմանել հայերեն լեզվի մոբայլ հավելվածի ստեղծման համար: Որոշեցինք դիմել եւ պատրաստել հավելվածը»,- նշել է նա:

Գրիգորի Էյրամջյանի խոսքով՝ նման հավելված ստեղծելու գաղափարն ավելի վաղ է ծագել:

«Ես ավելի քան 3 տարի է՝ բնակվում եմ Սան Ֆրանցիսկոյում: Այնտեղ՝ Սուրբ Հովհաննես առաքելական եկեղեցուն կից խմբակում, հայոց լեզու էի դասավանդում: Այնպես որ տեղյակ եմ, թե մարդիկ ինչ խնդիրների են բախվում հայերեն սովորելիս: Թիրախային խումբը Հայաստանից դուրս գտնվող մեր հայրենակիցներն են»,- պատմել է նա:
 
Գրիգորի Էյրամջյանն ընդգծել է, որ այս պահին իրենց գլխավոր խնդիրն է ավարտել հավելվածի iOS տարբերակը եւ դրա արդյունքում ձեռք բերել սպառման ավելի մեծ շուկա:

«Թեեւ Mashtots-ն արեւմտահայերեն է սովորեցնում, սակայն չեմ բացառում, որ հետագայում ստեղծենք նաեւ դրա արեւելահայերեն տարբերակը»,- ասել է Գրիգորի Էյրամջյանը:

Նա նշել է հավելվածը հայաստանյան կրթական ծրագրերում ներառելու մտադրության մասին:

Նարինե Դանեղյան