17:39 | 08.08.13 | Նորություններ | 3523

ՎիվաՍել-ՄՏՍ-ն սկսել է տեսակրպակներ տեղադրել մշակութային վայրերում

ՎիվաՍել-ՄՏՍ-ը Խոր Վիրապի վանական համալիրի տարածքում տեղադրել է տեսակրպակ:

Հայաստանում նման տեսակրպակ առաջին անգամ տեղադրվել է Էջմիածնի Սբ Գայանե եկեղեցու տարածքում: Նախագծի նպատակը հայկական մշակութային հուշարձանների մասին տեղեկացվածության մակարդակի բարձրացմանը եւ Հայաստանի՝ որպես տուրիստական գրավչության գոտու դիրքերի ամրապնդմանը նպաստելն է, հայտնել են ընկերությունում:

Տեսակրպակը տեղադրված է Սբ. Գեւորգ եկեղեցու առջեւ: Եկեղեցու ներսում է գտնվում այն վիրապը, ուր անազատության մեջ էր պահվում Գրիգոր Լուսավորիչը: Տեսակրպակն այցելուներին հնարավորություն կտա նկարահանել մեկ րոպե տեւողությամբ տեսանյութ եւ այն էլեկտրոնային փոստով ուղարկել մտերիմներին ու ընկերներին: Ծառայության արժեքը 500 դրամ է: Տեսասարքը տեղադրված է այնպիսի դիրքով, որպեսզի տեսագրության երկրորդ պլանում երեւա հուշարձանը: Հաղորդագրության մեջ ներառվում է տեղեկատվական ծանուցում` տվյալ հուշարձանի վերաբերյալ: Դա  հաղորդագրություն ստացողին հնարավորություն կտա եկեղեցու բակում գտնվողից ողջույն ստանալուն զուգահեռ` ծանոթանալ նաեւ հուշարձանի պատմությանը: Սարքը թույլ է տալիս հաղորդագրություններն ուղարկել անգլերեն, հայերեն կամ ռուսերեն լեզուներով:

«Տեսակրպակը հիշարժան պահերն առցանց հավերաժացնելու եւ տպավորություններով կիսվելու ամենադյուրին եւ արագ հնարավորություն է` հեռվում գտնվող ընտանիքի անդամների եւ ընկերների հետ: Այս լուծման եւ ՎիվաՍել-ՄՏՍ-ի  գերարագ ինտերնետի շնորհիվ, պատմական եւ մշակութային հետաքրքրություն ներկայացնող հերթական վայրն այսուհետեւ ապահովված է գրավչությունն աշխարհին ցուցադրելու հարմարավետ հնարավորությամբ: Տեսակրպակների տեղադրման նախագիծը հրաշալի գործիք է` Հայաստանը զբոսաշրջային հետաքրքրություն ներկայացնող երկրների շարքում ընդգրկելու համար: Այս լուծումը կօգնի նաեւ զբոսաշրջիկ-Հայաստան զգացմունքային կապի  ստեղծմանը եւ  քաղաքակրթությունների զարգացման  տիրույթում մեր հայրենիքի անունը մտապահելուն»,- ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

Ընկերությունը նախատեսում է տեսակրպակներ տեղադրել նաեւ Հայաստանի պատմամշակութային այլ հուշարձանների տարածքում:

Պատմամշակութային հուշարձանների մասին ամբողջական տեղեկությունները տրամադրվում են Մայր աթոռ Սբ. Էջմիածնի կողմից: