photo © Orange
photo © Orange
photo © Orange

Orange-ը տրամադրեց 18 կրթաթոշակ Գավառի եւ Իջեւանի ուսանողներին

Orange Հիմնադրամը կրթաթոշակներ է տրամադրել Գավառի պետական համալսարանի եւ Երեւանի պետական համալսարանի Իջեւանի մասնաճյուղի 18 ուսանողների:

Համալսարաններին Orange Հիմնադրամը փոխանցել է 2 000 000 դրամ, որը պետք է հատկացվի ուսանողների ուսման վարձի մարմանը, հայտնել են ընկերությունում:

Ուսանողներն ընտրվել են համալսարանների առաջարկով, երկու հիմնական չափանիշների հիման վրա` ուսանողի առաջադիմություն եւ ընտանիքի սոցիալական վիճակ: Նույն սկզբունքով այս ուսումնական տարվա ընթացքում ընդհանուր առմամբ տրամադրվել են կրթաթոշակներ 9 համալսարաններում:

Բուհերի հետ համագործակցության շրջանակներում ուսանողները կարող են մասնագիտական պրակտիկա անցնել Orange-ում, իսկ ընկերության աշխատակիցները մասնագիտական եւ վերապատրաստման դասընթացներ են իրականացնում ուսանողների համար: Գավառի համալսարանում մեկ տարի առաջ Orange-ի կողմից ստեղծվել է նաեւ անվճար WiFi-ով զինված ինտերնետ անկյուն, որն ուսանողներին եւ համալսարանի աշխատակիցներին թույլ է տալիս ինտերնետից օգտվել ինչպես կրթական, այնպես էլ ժամանցային նպատակներով:

«Համալսարանների հետ մեր համագործակցությունը շարունակվում է, իսկ այդ համագործակցության մի բաղկացուցիչն էլ օգնությունն է լավագույն ուսանողներին, ովքեր դժվարանում են լուծել բարձրագույն կրթություն ստանալու հետ կապված ֆինանսական դժվարությունները»,- ասել է Orange Հիմնադրամի գլխավոր քարտուղար Նազարեթ Սեֆերյանը:

Հայաստանի համալսարանների հետ Orange-ի համագործակցությունը մեկնարկել է երկու տարի առաջ: 2011-12 ուսանողական տարվա ընթացքում Orange Հիմնադրամը կրթաթոշակներ է տրամադրել 6 համալսարանների 67 ուսանողների, իսկ 2012-13-ին՝ 9 համալսարանների 95 ուսանողների, որոնցից 70-ը՝ Հայաստանի մարզերում: