Երեւան /Մեդիամաքս/. “ՎիվաՍել-ՄՏՍ” բջջային օպերատորը հայտարարել է “Մեքենա վարելիս մի` խոսիր” ակցիայի մեկնարկի մասին:
Ինչպես ՄԵԴԻԱՄԱՔՍ-ի հետ հարցազրույցում ասել է ընկերության գլխավոր տնօրեն Ռալֆ Յիրիկյանը, բջջային օպերատորը բոլոր վարորդներին կոչ է անում չօգտագործել բջջային հեռախոսներ ավտոմեքենա վարելիս` չկատարել եւ չընդունել զանգեր, չգրել եւ չընթերցել SMS հաղորդագրություններ:
“Կարող է տարօրինակ թվալ, որ բջջային օպերատորը բաժանորդներին կոչ է անում սահմանափակել բջջային հեռախոսի օգտագործումը, սակայն մենք պատրաստ ենք մեր եկամուտների մի մասը զիջել հանուն մարդկանց կյանքի պահպանման: Բացի այդ, մենք անհրաժեշտ ենք համարում բարձրացնել մեր հասարակության տեղեկացվածությունը կենսական հարցերի շուրջ”, - ասել է Ռալֆ Յիրիկյանը:
“Ցավոք, վիճակագրությունը վկայում է, որ վարելու ընթացքում բջջային հեռախոսի օգտագործումից առաջացած ճանապարհատրանսպորտային պատահարների թիվն անշեղորեն աճում է”, - ասել է “ՎիվաՍել-ՄՏՍ”-ի տնօրենը:
Ռալֆ Յիրիկյանը նշել է, որ օպերատորը լայն արշավ է ծավալելու “Մեքենա վարելիս մի` խոսիր” ակցիայի շրջանակներում:
Վիճակագրության համաձայն, ճանապարհատրանսպորտային պատահարների շուրջ 25 տոկոսը պայմանավորված է վարորդների կողմից բջջային հեռախոսի օգտագործմամբ:
