Երևան /Մեդամաքս/. France Telecom բջջային կապի օպերատորի մուտքը Հայաստան նոր որակ կհաղորդի հայ-ֆրանսիական հարաբերություններին: 

Ինչպես հաղորդում է ՄԵԴԻԱՄՍՔՍ-ի հատուկ թղթակիցը Պրահայից, այդ մասին հինգշաբթի օրը Ֆրանսիայի վարչապետ Ֆրանսուա Ֆիյոնի հետ հանդիպման ժամանակ ասել է ՀՀ նախագահ Սերժ Սարգսյանը:

Հանդիպման ընթացքում կողմերը քննարկել են երկկողմ հարաբերությունների զարգացման հեռանկարները: “Ֆրանսիան Հայաստանի բարեկամն է”,- հայտարարել է Ֆիյոնը:

Ֆրանսիայի վարչապետի խնդրանքով Սերժ Սարգսյանը ներկայացրել է հայ-թուրքական քաղաքական երկխոսության եւ Լեռնային Ղարաբաղի հակամարտության խաղաղ կարգավորման բանակցային գործընթացը: Անդրադառնալով Լեռնային Ղարաբաղի հակամարտության կարգավորման գործընթացին` ՀՀ նախագահը նշել է, որ հիմնախնդրի առանցքային հարցը Լեռնային Ղարաբաղի կարգավիճակն է, իսկ ԵԱՀԿ Մինսկի խմբի շրջանակում տեղի ունեցող բանակցային գործընթացը եւ բանակցային սեղանին առկա կարգավորման հիմնական սկզբունքները հնարավորություն են ընձեռում առաջ շարժվել: Նախագահ Սարգսյանն ընդգծել է, որ Հայաստանը պատրաստ է հակամարտության այնպիսի լուծմանը, որը կբերի երկարաժամկետ խաղաղության ապահովմանը:

Ֆրանսուա Ֆիյոնը պատրաստակամություն է հայտնել աջակցել հայ-թուրքական հարաբերություների կարգավորմանը:

ՀՀ նախագահը մայիսի 7-ին Պրահայում մասնակցել է ԵՄ “Արեւելյան Գործընկերություն” գագաթաժողովին: Երեկ երեկոյան Սերժ Սարգսյանը հանդիպել է նաեւ Մեծ Բրիտանիայի արտաքին գործերի նախարար Դեւիդ Միլիբենդին: