Ինդոնեզիան արգելել է iPhone 16-ի վաճառքը երկրում

Ինդոնեզիան արգելել է iPhone 16-ի վաճառքը երկրում, քանի որ Apple-ը չի կատարել տեղական տնտեսությունում ներդրումներ կատարելու պարտավորությունները, գրում է Bloomberg-ը։

Ինդոնեզիան պահանջում է, որ սմարթֆոններն ու պլանշետները լինեն 40%-ով տեղայնացված, սակայն Apple-ը չի կատարել այս պահանջը: Բացի այդ, ընկերությունը խոստացել է ներդնել 1,7 տրիլիոն ինդոնեզական ռուփիա (108 միլիոն դոլար) տեղական տնտեսության մեջ, բայց ներդրել է ընդամենը 1,5 տրիլիոն ռուփիա (95 միլիոն դոլար):

Տեղայնացումը մեծացնելու համար ընկերությունը կամ պետք է ներդրումներ կատարի տեղական տնտեսության մեջ, կամ օգտագործի տեղական բաղադրիչներ կամ հումք: Այլ ընկերություններ, ինչպիսիք են Samsung-ը եւ Xiaomi-ն, այդ նպատակով գործարաններ են հիմնել Ինդոնեզիայում: Փոխարենը Apple-ը ծրագրային ապահովման մշակողների համար բացել է չորս ակադեմիա:

Արգելքը չի տարածվում iPhone-ի հին մոդելների վրա։ Հնարավոր է նաեւ ներմուծել սարքեր անձնական օգտագործման համար: Վաճառքի լիցենզիա ստանալու համար Apple-ը ստիպված կլինի ներդնել մնացած միջոցները։