Team Telecom Armenia-ն իրականացնում է բաժնետոմսերի հրապարակային տեղաբաշխում (IPO)

«Տելեկոմ Արմենիա» ԲԲԸ-ն (ապրանքանիշը՝ Team Telecom Armenia) թողարկել եւ հրապարակային առաջարկի միջոցով տեղաբաշխում է բաժնետոմսեր՝ հնարավորություն տալով յուրաքանչյուրին մասնակցել ընկերության զարգացմանը, կատարել ներդրում, կիսել հաջողությունները եւ դառնալ Team-ի բաժնետեր։

Ընկերությունը նախատեսում է տեղաբաշխել 8 միլիարդ 240 միլիոն դրամ ընդհանուր արժողությամբ 40 միլիոն հատ բաժնետոմս։ Տեղաբաշխումն իրականացվելու է հունիսի 7-ից մինչեւ հոկտեմբերի 31-ը ներառյալ։

«Team Telecom Armenia-ն հեռահաղորդակցության ոլորտի առաջին ընկերությունն է, որը Հայաստանում իրականացնում է IPO։ Այս քայլով մենք դառնում ենք ավելի բաց ու հանրային, ձեւավորում ենք ավելի թափանցիկ գործելաոճ ու կիսելու ենք մեր հաջողություններն ինչպես բաժանորդների, այնպես էլ ապագա բաժնետերերի հետ։ Թիմային աշխատանքի շնորհիվ վերջին տարիների ընթացքում ընկերությունն ապահովում է ֆինանսական կայուն աճ եւ հաջորդ համարձակ քայլն է անում արդեն ֆինանսական ոլորտում։ Նոր ներդրումների շնորհիվ մեր հավակնոտ ծրագրերն իրականացնելու ենք ավելի արագ՝ միասին զարգացնելով հեռահաղորդակցության, թվային տեխնոլոգիաների ոլորտները եւ երկրի տնտեսությունը»,- նշել է Team Telecom Armenia-ի գլխավոր տնօրեն Հայկ Եսայանը։

Ներգրավված միջոցներն ընկերությունն ուղղելու է Հայաստանի ողջ տարածքում օպտիկամանրաթելային NGN ցանցի ընդլայնմանը, 5G բջջային ցանցի գործարկմանը եւ միջազգային նոր կապուղիների ակտիվացմանը։ Աշխատելով թվային տեխնոլոգիաների ոլորտում՝ ընկերությունը նաեւ մեծ ուշադրություն է դարձնելու ժամանակակից թվային գործիքների ու լուծումների ներդրմանը եւ այլ հավակնոտ ծրագրերի իրականացմանը։

«Տելեկոմ Արմենիա» ԲԲԸ-ի բաժնետոմսերի ազդագիրը գրանցվել է ՀՀ կենտրոնական բանկի նախագահի` 2023թ. մայիսի 31-ի Թիվ N 1/288Ա որոշմամբ: Բաժնետոմսերի տեղաբաշխողն է «ԱՄԵՐԻԱԲԱՆԿ» ՓԲ ընկերությունը։ Բաժնետոմսերի ձեռքբերման կարգին, ազդագրի էլեկտրոնային տարբերակին եւ բաժնետոմսերի հրապարակային առաջարկի վերաբերյալ հայտարարությանը կարելի է ծանոթանալ այստեղ։