Հայկական Zangi-ն Հրվ․Ամերիկայում առաջ է անցել Signal-ից եւ Viber-ից

Հայկական Zangi հավելվածը Հարավային Ամերիկայի տարածաշրջանում մեսենջերների շարքում 4-րդ տեղում է՝ առաջ անցնելով Signal-ից եւ Viber-ից:

Այս մասին ֆեյսբուքյան իր էջում հայտնել է Zangi-ի հիմնադիր եւ գլխավոր գործադիր տնօրեն Վահրամ Մարտիրոսյանը։

«Zangi-ն ամբողջ Հարավային Ամերիկայում՝ Մեքսիկայից մինչեւ Արգենտինա մեսենջերների մեջ դուրս է եկել 4-րդ տեղը։ Whatsapp, Telegram, Messenger, Zangi։ Այս ռեգիոնում մենք արդեն առաջ ենք անցել Signal-ից եւ Viber-ից։

Մենք աճում ենք նաեւ Հյուսիսային Ամերիկայում, արաբական աշխարհում եւ Ասիական տարածաշրջանում»,- գրել է նա։

photo © Վահրամ Մարտիրոսյանի ֆեյսբուքյան էջից

Zangi-ն անվտանգ մեսենջեր է, որը թույլ է տալիս տեքստային հաղորդագրություններ ուղարկել, բարձր որակի տեսազանգեր եւ աուդիոզանգեր կատարել։ Այն հասանելի է iOS եւ Android օպերացիոն համակարգերում։