#TalkAround․ ՄՌԿ մասնագետները քննարկել են ոլորտի մարտահրավերները

Դեկտեմբերի 8-ին Formula Hub կենտրոնում տեղի է ունեցել «Ինչպես ստեղծել, հավաքագրել եւ ընդլայնել արագ աճող թիմը» (“How to Set Up, Hire and Scale a Growth Strategy Team”) խորագիրը կրող #TalkAround քննարկումը։

Քննարկման խոսնակներ Հարություն Բաղդասարյանը (QLess), Սոնա Դավթյանը (Krisp), Մարգարիտա Հովհաննիսյանը (EasyDMARC) եւ Մարիամ Համբարձումյանը (TCF, 2MindS) խոսել են թիմեր հավաքագրելու եւ ընդլայնելու մարտահրավերների մասին՝ բերելով օրինակներ սեփական փորձից:

«Նախեւառաջ կարեւոր է սերմանել այն արժեքները, որոնք կնպաստեն առողջ միջավայր ստեղծելուն եւ վստահության ամրապնդմանը։ Նաեւ կարեւոր է կիսել տեսլականը՝ որտեղ ենք մենք եւ ուր ենք գնում»,- նշել է Հարություն Բաղդասարյանը։

Մարիամ Համբարձումյանի խոսքով՝ թիմերի ղեկավարները պետք է սեփական օրինակով մոտիվացնեն աշխատակիցներին՝ գործառնական քայլերից մինչեւ պրոդուկտին առնչվող հարցեր։  

«Ինժեներներ հավաքագրելը բարդ գործընթաց է, բայց էլ ավելի կարեւոր է, որպեսզի թիմին միացող ինժեներները պատրաստ լինեն նոր բան սովորել»․- ասել է Մարգարիտա Հովհաննիսյանը։

Սոնա Դավթյանը կարեւորել է T-shaped մասնագետների հավաքագրումը, որոնք կունենան խորը գիտելիքներ եւ հմտություններ մասնագիտացման տարբեր ուղղություններով եւ աշխատանքի տարբեր կտորների միջեւ կապեր հաստատելու ցանկություն ու կարողություններ:

Սա Հայաստանի Բիզնես Հրեշտակների Ցանցի (BANA Angels) թվով 4-րդ #TalkAround ձեւաչափով միջոցառումն էր, որի նպատակն է վերհանել եւ քննարկել տեխնոլոգիական արդյունաբերության էկոհամակարգի արդի խնդիրներն ու մարտահրավերները։