15:40 | 02.06.21 | Հարցազրույցներ | exclusive 28683

Սերգեյ Ասատրյան. «Հաջողակ Գազարներն» օգնում են տվյալների վրա հիմնված որոշումներ կայացնել

Lucky Carrot-ը («Հաջողակ Գազարը») վիրտուալ գազարներով միմյանց «Շնորհակալություն» հայտնելու հարթակ է, որը, չափելով աշխատակիցների ներգրավվածությունը, դուրս է բերում իրական խնդիրներն ու գործիքներ է տալիս դրանք լուծելու համար։

Հարթակը նաեւ նպաստելով ընկերության մշակույթի ձևավորմանն ու պահպանմանը՝ օգնում է ժամանակին կանխատեսել, թե որ աշխատակիցներն են գտնվում  ընկերությունը լքելու ռիսկային գոտում և հակառակը՝ ովքեր են ընկերության մշակույթի կրողները։ Lucky Carrot-ի նպատակն է ցանկացած ընկերություն դարձնել լավագույնը իր  աշխատակիցների համար։  

Հարթակի վերլուծական մասի և սպասվող նոր գործիքների մասին Itel.am-ը զրուցել է Lucky Carrot-ի համահիմնադիր Սերգեյ Ասատրյանի հետ։

- Այն, որ մարդկային ռեսուրսների կառավարման մասնագետներն իրենց ուրույն  դերն ունեն բիզնեսի զարգացմանը նպաստող որոշումների կայացման հարցում, այլևս գաղտնիք չէ։ Ինչպե՞ս է Lucky Carrot-ն օգնում ՄՌԿ մասնագետներին այդ  հարցում։

- Այսօր, բոլոր ՄՌԿ մասնագետների կարևոր խնդիրներից մեկն է կազմակերպության ղեկավարին ներկայացնել օբյեկտիվ վերլուծական տվյալներ, որոնք կվերաբերեն ոչ միայն աշխատակիցների հետ կապված ֆինանսական գործընթացներին, այլ կներառեն հավաքագրումից մինչև տաղանդների ուսուցմանն ու զարգացմանը վերաբերող  վերլուծական տվյալներ։ Ավելին, ՄՌԿ ռազմավարությունը պետք է հիմնված լինի  վերլուծական տվյալների վրա, որն էլ կնպաստի բիզնեսում հենց այդ տվյալների վրա  հիմնված (data-driven) որոշումների կայացմանը։

Իսկ Lucky Carrot-ը, լինելով աշխատակիցների ներգրավվածության հարթակ, իր հերթին  խնդիր ունի ոլորտի մասնագետներին տրամադրել համապատասխան վերլուծական  տվյալներ, որոնք կօգնեն աշխատակիցների զարգացումը հիմնավորել վերլուծական  տվյալներով։

Լինելով արդեն երկու տարեկան, հասցրել ենք զարգացնել գործիքներ, որոնք օգնում են  ՄՌԿ մասնագետներին չափել աշխատակիցների ներգրավվածությունն ու դուրս բերել  խնդրահարույց մետրիկաները, ինչպես նաև՝ դուրս բերել ընկերության ինֆորմալ  լիդերներին և այն աշխատակիցներին, որոնք դեմոտիվացված են և գտնվում են աշխատավայրը լքելու ռիսկային գոտում։ Հարթակը նաեւ թույլ կտա կանխատեսել աշխատակիցների  հոսունությունը (խմբ.՝ որոշակի ժամանակահատվածում ազատված ու ընդունված աշխատողների հարաբերակցությունը), ինչպես նաև՝ հիմնվելով peer to peer recognition-ի վրա, նպաստել ընկերության կորպորատիվ մշակույթի ստեղծմանն ու պահմանմանը։

- Նշեցիք, որ Lucky Carrot-ը դուրս է բերում ընկերության ոչ ֆորմալ լիդերներին և  կանխատեսում է աշխատակիցների հոսունությունը։ Ընկերության ղեկավարի, ինպես նաև ՄՌԿ մասնագետի համար հավանաբար ամենացավալի իրողություններից է, երբ աշխատակիցը լքում է ընկերությունը։ Ինչպե՞ս են «Հաջողակ գազարները» նպաստում այդ վերլուծական տվյալների հավաքագրմանը։

- Այդ վերլուծական տվյալները ծրագիրը ավտոմատ կերպով գեներացնում է peer-to-peer  recognition-ի հիման վրա։

Ինչպե՞ս է գործնականում աշխատում։ Աշխատակիցները ընկերության կողմից ստանում են հավասար քանակի միավորներ՝ վիրտուալ գազարներ, որոնք կարող են օգտագործել  միմյանց շնորհակալություն ասելու (Recognize անելու) նպատակով։

Յուրաքանչյուրի շնորհակալությունը (Recognition-ը) հիմնված է ընկերության արժեքներից մեկի վրա․ դրանք  կարող են լինել՝ #որոշումների-կայացում, #խնդիրների-լուծում, #ինքնազարգացում և այլն,  որոնք էլ իրենց հերթին դուրս են բերում ընկերության ոչ ֆորմալ լիդերներին։ Ոչ ֆորմալ լիդերները ընկերության հիմնաքար հանդիսացող աշխատակիցներն են։ Հենց նրանք են գտնվում ներքին հաղորդակցությունների կենտրոնում և ամբողջությամբ կրում են ընկերության արժեքները։ Իսկ արդեն աշխատակիցների միջև կապը ցույց տվող գրաֆիկան, որը նույնպես ձևավորվում է միմյանց շնորհակալություն ասելու գործընթացի վրա, դուրս է բերում ռիսկային գոտում գտնվող աշխատակիցներին, որոնք արդեն  ներգրավված չեն և պատրաստվում են լքել կազմակերպությունը։
    
Ըստ մեր վերջին դուրս  բերած օրինաչափության, այս աշխատակիցները ընկերությունում իրենց գտնվելու վերջին  երկու-երեք ամիսների ընթացքում ավելի քիչ քանակի գազարներ են ստանում իրենց  գործընկերներից։

Ծրագիրը վիզուալ կերպով առանձնացնում է ռիսկային գոտում գտնվող աշխատակիցներին, որոնց հետ հարկավոր է տետ-ա-տետ (One on One) հանդիպումներ  կազմակերպել։


Բացի այդ, ներքին հաղորդակցությունների գրաֆիկան ֆիլտրերի օգնությամբ ցույց է  տալիս նաև բաժինների միջեւ հաղորդակցությունը (interdepartmental communications) և այն աշխատակիցներին, որոնք ռազմավարական նշանակություն ունեն այդ կապերի պահպանման հարցում։

Արդյունքում՝ ՄՌԿ մասնագետն ունենում է իրենց ճանաչված և երջանիկ զգացող աշխատակիցներ և դրա վրա հիմնված վերլուծական տվյալներ, որոնք իրենց որոշիչ դերն են ունենում որոշումների կայացման հարցում։

- Ինչպե՞ս է Lucky Carrot-ը չափում աշխատակիցների ներգրավվածությունն ու դուրս բերում ներգրավվածության խնդրահարույց մետրիկաները։

- Ամեն ինչի հիմքում ընկած են մարդիկ։ Հենց մարդկանցից է կախված՝ մեր բիզնեսը  կհաջողի, թե կգնա կործանման։ Այդ իսկ պատճառով ընկերության աշխատակիցներին  ճանաչելն ու հետադարձ կապ ապահովելու հնարավորություն տալն առավել քան կարևոր է։ Ներգրավվածությունը չափող հարցաշարը հենց այս նպատակով էլ ավելացրել ենք։ Աշխատակիցները ինտերակտիվ կերպով անանուն պատասխանում են 10 հարցերին, որոնք վերաբերում են ներգրավածության 10 մետրիկաներին։ Արդյունքում ձևավորվում է ընկերության ներգրավվածության ցուցանիշը։


Հարցաշարի կարճ լինելը թույլ է տալիս հարցումն իրականացնել առավել հաճախ, որն էլ իր հերթին օգնում է արագ դուրս բերել խնդիրը և անմիջապես լուծել այն։ Այսպես մենք  նպաստում ենք ընկերության առողջ մշակույթի պահպանմանը, հոսունության կրճատմանն ու ընկերության դինամիկ զարգացմանը։

Մենք պետք է կարողանանք ճիշտ գնահատել մեզ և մեր կարողությունները: Եթե մենք չգիտենք ինչ խնդիրներ ունենք ներգրավվածության հետ կապված կամ պարզապես  խուսափում ենք դրանցից, ապա չենք աշխատի պատշաճ լուծումների վրա։

- Ի՞նչ նոր գործիքներ եք պլանավորում ավելացնել Lucky Carrot-ում։

- Աշխատակիցների ներգրավվածության աճը բնականաբար ունենում է իր ազդեցությունն ընկերության շահութաբերության, կատարողականության և հաճախորդների հաջողությունների գրանցման (Customer Success) վրա։ Եթե թվերով ասեմ, ապա, երբ ներգրավվածությունն աճում է 20%-ով, կատարողականությունն աճում է 7%-ով,  շահութաբերությունը՝ 4%-ով, իսկ հաճախորդների հաջողությունները՝ 7%-ով։

Հավատարիմ մնալով մեր նպատակներից մեկին, որն է՝ հնարավորինս լայն ծավալի տվյալներ տրամադրել մարդկային ռեսուրսների ղեկավարներին, առաջ եկավ կատարողականությունը չափող գործիքների ավելացման անհրաժեշտությունը։ Գործիքները թույլ կտան ոչ միայն չափել աշխատակիցների կատարողականությունն, այլ նաև տեսանելի դարձնել ներգրավվածության և կատարողականության փոխադարձ  ազդեցությունը։

Կատարողականության գործիքները պլանավորում ենք ներկայացնել հայկական  ընկերությունների ՄՌԿ մասնագետներին հունիսի 3-ին՝ Holiday Inn-Republic Spuare Hotel ում կայանալիք HR Data: Leading Business to Success խորագրով միջոցառմանը։

Մեր փորձը ցույց է տվել, որ տվյալների վրա կայացրած որոշումներն օգնում են հաղթահարել մեր առջև դրված մարտահրավերները։ Եվ այն արժեքները, որի շուրջ մեզ համախմբել է մեր ընկերությունը, օգնում է զարգացնել այնպիսի լուծումներ, որոնք կհամախմբեն նաեւ այլ թիմերի և կդարձնեն իրենց ընկերությունը լավագույնը հենց իրենց համար։

Սերգեյ Ասատրյանի հետ զրուցել է Նարինե Դանեղյանը