11:30 | 14.05.21 | Նորություններ | 1237

    Նախագահն այցելել է «Յանդեքս»-ի գլխավոր գրասենյակ

    Աշխատանքային այցով Մոսկվայում գտնվող՝ Հայաստանի Հանրապետության նախագահ Արմեն Սարգսյանն այցելել է «Յանդեքս» ընկերության գլխավոր գրասենյակ:

    Նախագահը հանդիպել է ընկերության գլխավոր տնօրեն Ելենա Բունինայի եւ գործադիր տնօրեն Տիգրան Խուդավերդյանի հետ։

    Արմեն Սարգսյանն ընկերության տնօրենների հետ շրջել է «Յանդեքս» ընկերության տարածքում, ծանոթացել իրականացվող աշխատանքներին, ինչպես նաեւ «Յանդեքս»-ի նորարարական եւ գիտակրթական նախագծերին ու ծրագրերին։

    Նախագահ Սարգսյանին են ներկայացվել «Յանդեքս»-ի կրթական ծրագրերը, որոնք իրականացվում են ինչպես Ռուսաստանում, այնպես էլ Բելառուսում եւ մասամբ նաեւ Հայաստանում:

    Քննարկման մասնակիցներն ընդգծել են Հայաստանում իրականացվող կրթական ծրագրերի ծավալն ընդլայնելու անհրաժեշտությունը: Մասնավորապես, հեռանկարային է համարվել Հայաստանում արհեստական բանականության եւ տվյալների վերլուծությամբ զբաղվող մասնագետների վերապատրաստման նպատակով «Յանդեքս»-ի դպրոցի մասնաճյուղի բացումը։