Նախարար. Հարվածային եւ հետախուզական ԱԹՍ-ների մասով հասնում ենք արտադրական հնարավորությունների

ՀՀ բարձր տեխնոլոգիական արդյունաբերության նախարար Հակոբ Արշակյանը այսօր լրագրողների հետ զրույցում անդրադարձել է հարվածային եւ հետախուզական անօդաչու թռչող սարքերին, նշելով, որ այս ուղղությամբ կան տասնյակ ֆինանսավորված նախագծեր, որոնց մի մասն արդեն տրամաբանական ավարտին է հասցվում:

«Թե՛ հարվածային, թե՛ հետախուզական տեսանկյունից արդեն իսկ հասնում ենք արտադրական հնարավորությունների: Հետախուզական ԱԹՍ-ները, որոնք իրենց պարամետրերով նմանատիպերին չեն զիջում, արդեն իսկ կարող են արտադրվել Հայաստանում եւ նաեւ լայնորեն կիրառվել են մեր զինված ուժերի կողմից՝ Արցախյան պատերազմի ընթացքում»,- նշել է Արշակյանը:

Նախարարը խոսել է նաեւ օպտիկական տեսադիտարկման համակարգերի մասին, նշելով, որ ունենք բավականին լուրջ մշակումներ:

«Արդեն ունենք արտադրական հզորություններ: Առաջիկայում դրանք կընդլայնվեն, եւ ավելի մեծ հնարավորություններ կստեղծվեն ինչպես մեր Զինված ուժերի ձեռքբերումների տեսանկյունից, այնպես էլ արտահանման տեսանկյունից»,- ընդգծել է Հակոբ Արշակյանը:

Նա նաեւ հայտարարել է, որ Կառավարությունն առաջնահերթություն է տվել ռազմարդյունաբերության ոլորտին:

«2017թ. ունեցել ենք 1,6 մլրդ դրամ հատկացումներ գիտահետազոտական եւ  փորձակոնստրուկտորական աշխատանքների մասով: 2018թ. այն աճել է մինչեւ 2,4 մլրդ դրամ, 2019թ.՝ 3,8 մլրդ, 2020թ.  փաստացի կազմել է 3,3 մլրդ դրամ եւ դրան գումարվել է եւս 3,4 մլրդ դրամ՝ լրացուցիչ հատկացումներ պատերազմի մեկնարկի հետ զուգահեռ: 2021թ. նախատեսվում է 4,6 մլրդ դրամ: Այսինքն՝ եթե համեմատենք 2017 թ. հետ, այն գրեթե երեք անգամ գերազանցում է այս հատկացումները»,- նշել է Հակոբ Արշակյանը: