Հուլիսի 29-ին ԱԳ նախարար Զոհրաբ Մնացականյանն այցելել է արդեն չորրորդ տարին անընդմեջ անցկացվող «Սեւան Ստարտափ Սամմիթ 2019», որը մեկնարկել էր հուլիսի 28-ին եւ մեկ հարկի տակ միավորել ավելի քան 1000 ձեռներեցների ողջ աշխարհից:
Խարույկի շուրջ զրույցի ընթացքում նախարարը, ողջունելով Սամմիթի մասնակիցներին, նշեց, որ Սեւանում հավաքված երիտասարդությունն արտացոլում է անհատական ազատության, կարողությունների, վստահության եւ համարձակության ոգին:
Խոսելով երիտասարդության ներուժի լիարժեք իրացման մասին՝ Զոհրաբ Մնացականյանն ընդգծել է. «Մենք ապրում ենք մի ժամանակաշրջանում, երբ երիտասարդությունն ամենահամարձակն է։ Ձեր կողմից առաջարկվող համարձակ գաղափարները լավագույնն են, եթե նաեւ ծառայում են սերունդների բարեկեցությանը։ Ձեր համարձակությանը կհետեւի նաեւ հասարակությունը, նաեւ պետությունը։ Ես իսկապես շատ ուրախ եմ լինել այստեղ, քանի որ դուք բոլորդ արտացոլում եք այդ համարձակության զգացումը, որը փոխանցվում է նաեւ ինձ»։
Անդրադառնալով կառավարության առաջնահերթություն հանդիսացող տեղեկատվական տեխնոլոգիաների, նորարարության եւ ստարտափների ոլորտի զարգացման ուղղությամբ ձեռնարկվելիք քայլերին՝ նախարարն ընդգծել է, որ կառավարության հիմնական գործառույթը համապատասխան միջավայրի, համապատասխան հարթակի ձեւավորումն է: «Որպես կառավարության ներկայացուցիչ՝ մեկ բան հստակ կարող եմ ասել. լավագույն օգնությունը խոչընդոտ չդառնալն է: Ուստի, մեր կողմից ամենակարեւորն է ապահովել միջավայր, որում այդ անհատական նախաձեռնությունները կարող են լավագույնս դրսեւորվել, ապահովել ճիշտ օրենքներ, ստեղծել օրենսդրական դաշտ, որը ձեր նախաձեռնությանը կտա ինքնադրսեւորվելու հնարավորություն, ապահովել միջավայր, որտեղ ձեր աշխատանքը լավագույն կերպով կիրագործվի»:
«Մենք մի ժողովուրդ ենք, որն օժտված է ինքնության, պատմության բարձր զգացումով: Մենք գիտենք` մենք ով ենք. մենք աշխարհի որեւէ այլ ժողովրդից ավելի լավը կամ ավելի վատը չենք: Մենք մի մասնիկն ենք ազգերի հրաշալի ընտանիքի: Մենք շատ հպարտ եւ վստահ ժողովուրդ ենք, որը գիտի իր պատմությունը եւ գիտի, թե ինչ է ցանկանում ապագայի համար։ Եվ այստեղ հավաքված երիտասարդ սերունդն արդեն իսկ հայտարարել է, թե ինչ է ցանկանում ապագայի համար, եւ նրանք դա արել են իրենց ձեւով՝ հստակ ուղերձ հղելով պետությանը, որ ցանկանում են ազատություն, օրենքի գերակայություն, ժողովրդավարություն, որպեսզի արարեն եւ լինեն օրենքով պաշտպանված: Այս ամենը կառավարության համար շատ պարտավորեցնող է։ Սա այն մանդատն է, որի վրա հիմնված է այս կառավարությունը»,- ընդգծել է ԱԳ նախարարը։
Զոհրաբ Մնացականյանը նաեւ պատասխանել է «Սեւան Ստարտափ Սամմիթ 2019»-ի մասնակիցների հարցերին:
Խարույկի շուրջ զրույցից առաջ ԱԳ նախարարը շրջայց է կատարել ճամբարում, ծանոթացել ծրագրի մանրամասներին եւ նպատակին։
